चितवनमा दोस्रो संस्करणको ‘चितवन अटो शो २०२६’ आयोजना हुने भएको छ। चितवन अटोमोबाइल डिलर्स एसोसिएसन र चितवन अटोमोबाइल्स एसोसिएसनको संयुक्त आयोजनामा भरतपुरस्थित चितवन प्रदर्शनी केन्द्रमा आगामी बैशाख १७ गतेदेखि २१ गतेसम्म अटो शो सञ्चालन गरिने जानकारी आज आयोजित पत्रकार सम्मेलनमार्फत दिइएको हो।

आयोजकका अनुसार अटोमोबाइल व्यवसायको प्रवर्द्धन, सुरक्षित सवारी सञ्चालन र सडक दुर्घटना न्यूनीकरणका लागि जनचेतना फैलाउने उद्देश्यले कार्यक्रम आयोजना गर्न लागिएको हो। संयोजक राजन पियाका अनुसार कार्यक्रममा आधुनिक प्रविधियुक्त सवारीसाधन, विशेषगरी विद्युतीय (EV) गाडी तथा स्मार्ट मोबिलिटी समाधानहरू प्रदर्शन गरिनेछन्।

अटो शोमार्फत उपभोक्तालाई नयाँ प्रविधिबारे जानकारी दिनुका साथै सवारी खरिदप्रति आकर्षण बढाउने लक्ष्य राखिएको छ। कार्यक्रममा सवारी खरिदमा विशेष छुट, आकर्षक स्किम, अन-द-स्पट फाइनान्स तथा इन्स्योरेन्स सेवाहरू उपलब्ध हुनेछन्।

कार्यक्रममा विभिन्न ब्रान्डका कार, जिप, मोटरसाइकल र स्कुटरका करिब ७५ स्टल रहनेछन् भने बैंक तथा बीमा कम्पनीहरूको पनि सहभागिता रहनेछ। अवलोकनकर्तामध्ये केहीलाई लक्की ड्रमार्फत आकर्षक पुरस्कार प्रदान गरिने आयोजकले जनाएको छ।

त्यसैगरी, अटो शोमा पुराना ‘भिन्टेज’ गाडी, महँगा ‘बिग बाइक’ को प्रदर्शनी, मोटरसाइकल स्टन्ट, जिमखाना तथा टीडीएस ¥यालीजस्ता कार्यक्रमहरू पनि समावेश गरिनेछन्। तेस्रो दिन ‘अटो सेमिनार’ तथा चौथो दिन विद्यालयस्तरीय विद्यार्थीलाई लक्षित गर्दै हेल्मेट प्रयोगसम्बन्धी सचेतना कार्यक्रम सञ्चालन गरिनेछ। उक्त कार्यक्रममा विद्यार्थी र अभिभावकको सहभागितामा अन्तर्राष्ट्रियस्तरका हेल्मेटसमेत वितरण गरिनेछ।

करिब १० हजार दर्शकले अवलोकन गर्ने अपेक्षा गरिएको यस अटो शोमा करिब ५० करोड रुपैयाँ बराबरको कारोबार हुने अनुमान गरिएको छ। साथै, दैनिक सांस्कृतिक कार्यक्रमसमेत आयोजना गरिनेछ। आयोजकले कार्यक्रम सफल बनाउन सबै सरोकारवालालाई सहयोग गर्न आग्रह गरेका छन्।