चितवन, १८ जेठ । विश्व दूध दिवसको अवसर पारेर पवित्र धार्मिकस्थल देवघाटस्थित रामजानकी बालिका आश्रममा आश्रित बालबालिकाहरुलाई दूध र दुग्धजन्य परिकार वितरण गरिएको छ । दूधको महत्व र यसको फाइदाबारे चेतना फैलाउन २५ औँ दूध दिवसमा चितवन जिल्ला दुग्ध उत्पादक सहकारी संघ लिमिटेड र पशु सेवा कार्यालय चितवनले आश्रममा आश्रित बालिकाहरुलाई दूध तथा दुग्धजन्य पदार्थ वितरण गरेको हो ।

कार्यक्रमका अवसरमा केन्द्रीय दुग्ध सहकारी संघ लिमिटेड नेपालका उपाध्यक्ष भागीरथ तिमल्सेनाले संघले दूधको बजारीकरणमा ठूलो भूमिका खेलेको बताउनुभयो । संघले किसानको समस्या समाधान गर्दै मानवीय र सामाजिक सेवामा समर्पित भएको उदाहरण प्रस्तुत गर्दै बालिका आश्रममा दूधजन्य पदार्थ वितरणसँगै भोजन गराउनुले प्रष्ट भएको उहाँको भनाइ छ । दूध उत्पादन हुने बिक्री नहुने, दूध बिक्री भए भुक्तानी नपाउने किसानको समस्या भएको भन्दै उहाँले यो समस्या समाधानका लागि सबैले पहल गर्नुपर्ने बताउनुभयो ।

उक्त कार्यक्रममा जिल्ला दुग्ध उत्पादक सहकारी संघ लिमिटेडका अध्यक्ष किशोर बगालेले आफूहरुले दूधको उत्पादन लागत घटाउनका लागि किसानहरुलाई विभिन्न तालिम र प्राविधिक सहयोग उपलब्ध गराउँदै आएको बताउनुभयो । दूधको भुक्तानी समयमै नपाउँदा किसानमा नैराश्यता उत्पन्न भएको भन्दै उहाँले दूध बिक्री हुँदा पनि डेरीहरुले किसानलाई समयमै भुक्तानी नगरेका बताउनुभयो । सरकारी स्वामित्वमा रहेको डिडिसीले नै ६ महिनादेखि किसानको भुक्तानी रोकेको भन्दै उहाँले दूधको पैसा समयमै दिनेगरी सरकारले काम गर्नुपर्ने बताउनुभयो ।

जिल्लामा रहेका एक सय १५ वटा सहकारीमा आबद्ध ४० हजार बढी किसानले दैनिक तीन लाख ५० हजार लिटर दूध उत्पादन गर्दै आएका छन् । यहाँ उत्पादन भएको दूधमध्ये ५१ प्रतिशत दूध जिल्ला बाहिर पठाउने गरेको भए पनि किसानले समयमै भुक्तानी पाउन सकेका छैनन् । किसानले सात महिनादेखि दूधको भुक्तानी नपाएको भन्दै किसानले विभिन्न डेरीबाट पाउनुपर्ने रकम रु ८० करोड पुगेको बगालेको भनाइ छ । यहाँबाट ४२ वटा डेरीले नियमित दूध लैजाने गरेको भए पनि सात वटा डेरीलेमात्रै नियमित भुक्तानी गर्दै आएका छन् ।

चितवन जिल्ला दुग्ध उत्पादक सहकारी संघ लिमिटेडका अध्यक्ष किशोर बगालेको अध्यक्षतामा भएको कार्यक्रममा उपाध्यक्ष रामेश्वर सिं ओलीले स्वागत मन्तव्य राख्नुभएको थियो । आश्रममा ३१ जना बालिकाहरु आश्रित छन् ।