चितवन, ९ जेठ । आम निर्वाचनको झल्को दिनेगरी भरतपुर–१० मा रहेको इडन गार्डेन अङ्ग्रेजी माध्यमिक विद्यालयमा आयोजित नमूना मतदानबाट विद्यार्थी नेताहरु छानिएका छन् ।

विद्यार्थीको नेतृत्व सीप विकासका लागि शुक्रबार भएको मतदानबाट विद्यार्थीहरुले आगामी एक वर्षका लागि आफ्नो नेता छानेका हुन् । शुक्रबार भएको मतदानबाट विद्यालयको हेड ब्वाय, हेड गर्ल तथा विभिन्न हाउसका क्याप्टेन र भाइस क्याप्टेन चयन गरिएको हो । विद्यालयका कक्षा २ देखि १० सम्मका कुल तीन सय ४७ मतदाता विद्यार्थीमध्ये तीन सय ३६ मतदाता विद्यार्थी मतदान कार्यक्रममा सहभागी भएका थिए ।

आगामी एक वर्षका लागि विद्यार्थीहरुको मतदानबाट हेड ब्वायमा प्रिन्स गुरुङ र हेड गर्लमा सलिना पुरी निर्वाचित भएका छन् । त्यस्तै रेड हाउसको क्याप्टेनमा आयुष थापा तथा भाइस क्याप्टेनमा राजु शाह, ब्लु हाउसको क्याप्टेनमा प्रतिक ज्ञवाली तथा भाइस क्याप्टेनमा अनु गुरुङ, एल्लो हाउसको क्याप्टेनमा संदीपा विक तथा भाइस क्याप्टेनमा अमृत जोशी र ओरेन्ज हाउसको क्याप्टेनमा मञ्जिल विक तथा भाइस क्याप्टेनमा वितिशा कुँवर निर्वाचित भएका छन् ।

निर्वाचनलाई सफलताका साथ सम्पन्न गर्ने गराउनका लागि चार वटा मतदान केन्द्र तथा चार जना मतदान अधिकृतको व्यवस्था गरिएको निर्वाचन अधिकृत तथा विद्यालयका सहायक प्रिन्सिपल मुक्तिनाथ अधिकारीले जानकारी दिनुभयो । निर्वाचित विद्यार्थी नेताहरुलाई बधाई एवम् शुभकामना व्यक्त गर्दै विद्यालयका प्राचार्य ईश्वरराज पण्डितले विद्यार्थी नेताहरुले आफ्नो जिम्मेवारी मर्यादापूर्वक ढंगबाट पूरा गर्न आग्रह गर्नुभयो । निर्वाचन पश्चातको मत परीणाम घोषणा एवम् बधाई ज्ञापन कार्यक्रमको सञ्चालन विद्यालयको शैक्षिक संयोजक प्रकाश सुवेदीले गर्नुभएको थियो । मतदान अवधिभर पुष्पाञ्जली हस्पिटल प्रालीले हेल्थ डेस्क स्थापना गरी विद्यार्थीलाई प्राथमिक उपचारको व्यवस्था प्रदान गरेको थियो ।

यसैबीच, मतदानको पूर्वसन्ध्यामा बिहीबार विद्यालयमा उम्मेदवार विद्यार्थीहरुले नमूना पत्रकार भेटघाट कार्यक्रमसमेत गरेका थिए । पत्रकार भेटघाट कार्यक्रममा पत्रकारको भूमिका निर्वाह गरेका विद्यार्थीहरुले उम्मेदवारहरुलाई प्रश्न सोध्ने र उम्मेदवारहरुले उत्तर दिने गरेका थिए । सो पत्रकार भेटघाटमा निर्वाचन अधिकृत अधिकारीले विद्यार्थीहरुलाई निर्वाचन प्रकृयाको जानकारी गराउँदै निर्वाचन आचारसंहिताबारे प्रष्ट पार्नुभएको थियो ।