नवलपुर, ३० चैत । हनुमान जयन्तीको अवसर पारेर आज यहाँको हनुमान मन्दिरमा ३१ किलोको लड्डु अर्पण गरिएको छ । नवलपरासी (बर्दघाट–सुस्तापूर्व)को गैँडाकोट–९ थुम्सीमा रहको हनुमान मन्दिरमा ३१ किलोको लड्डु अर्पण गरिएको हो ।
गैँडाकोट नगरपालिका प्रमुख मदनभक्त अधिकारी, उपप्रमुख शान्ति कोइरालासहित मन्दिर व्यवस्थापन समिति एवम् भक्तजनहरुले संयुक्त रुपमा महावली हनुमानलाई ३१ किलोको लड्डु अर्पण गर्नुभएको हो । लड्डु हनुमानको प्रिय भोजन भएकाले घिउमा निर्माण गरिएको ३१ किलोको लड्डु उहाँलाई अर्पण गरिएको मन्दिर व्यवस्थापन समितिले जनाएको छ । प्रत्येक वर्ष चैत्र शुक्ल पूर्णिमाका दिन मनाइने हनुमान जन्मजयन्तीका अवसरमा आज यस हनुमान मन्दिरमा भक्तजनको घुइँचो लागेको छ ।
पूर्वपश्चिम राजमार्गसँगै जोडिएको यस मन्दिरमा पूजाआज गर्नका लागि जिल्लावासीसहित छिमेकी जिल्ला चितवन, तनहुँबाटसमेत भक्तजनहरु आएका छन् । चैत्र शुक्ल पूर्णिमाका दिन हनुमानको पूजा आराधना गरेमा बल, वुद्धि, विद्या मिल्ने, दुःख र सङ्कटबाट मुक्ति पाइने विश्वास छ । हनुमान मन्दिर समिति चक्रघाटका अध्यक्ष टीकाराम सापकोटाले हनुमान जयन्तीको अवसरमा आज मन्दिरमा पूजाआजसहित भजन कीर्तन भइरहेको बताउनुभयो ।
हनुमानको पूजा आराधना गरेमा रोग व्याधि, बाधा, राजाको भय, प्राकृतिक शक्तिको बाधा, पिचासी शक्ति, भूत, नकारात्मक तत्व, बतास, खोला, आगो, राक्षसी शक्तिको प्रकोप र बेतालबाट पनि मुक्ति पाइन्छ भन्ने मान्यता रहेको मन्दिरका पूजारी विनय अधिकारीले बताउनुभयो । हनुमानको मूर्तिमा सिन्दूर लगाइएको हुन्छ । सिन्दुरले हड्डी एवं मांशलाई सुसङ्गठित शरीर निर्माणमा भूमिका खेल्ने उहाँको भनाइ छ ।
मङ्गलबार र शनिबार हनुमानको विशेष आराधना गर्ने गरिएकामा यस वर्ष हनुमान जयन्ती आज शनिबार नै परेकाले पनि विशेष अवसर मानिएको अधिकारीले बताउनुभयो । गैँडाकोटमा निर्माण भएको हनुमान मन्दिर नेपालकै पहिलो, भव्य र कलात्मक मन्दिर भएको भन्दै उहाँले रु तीन करोड लागतमा ४२ फुट लम्बाई, ४२ फुट चौडाई र ६३ फुट उचाइ भएको मन्दिर निर्माण गरिएको जानकारी दिनुभयो । विभिन्न चन्दादाताहरुको सहयोगमा मन्दिर परिसरमा १०० जनासम्म अट्ने धर्मशाला निर्माण कार्य भइरहेको छ ।
हनुमानको दिव्यमूर्ति, कलाकारिताले परिपूर्ण मन्दिरको बाहिरी पाटो, शिखरखजुराव शैलीको गुम्बज, काष्ठकलाका कलात्मक झ्यालढोका, रामदरबार, स–साना गुम्बज आकारका मार्बल रेलिङ, मार्बलकै आँखीझ्याल, सिँढी तथा आकर्षक विद्युत् व्यवस्थापन र रङ्गरोगनले यस मन्दिरमा आकर्षण बढाएको अध्यक्ष सापकोटाको भनाइ छ ।
