नवलपुर, ९ चैत । गृहमन्त्री रमेश लेखकले गणतन्त्रको विकल्प राजतन्त्र हुन नसक्ने बताउनुभएको छ । आज नवलपरासी (बर्दघाट–सुस्तापूर्व)को गैँडाकोटमा आयोजित कार्यक्रममा गृहमन्त्री लेखकले गणतन्त्रमा केही पनि भएन भन्ने प्रचार गर्न खोजिएको भन्दै गणतन्त्रमा धेरै परिवर्तन आएका बताउनुभयो ।
मुलुकमा बेराजगारी समस्या, आर्थिक समस्यासहित धेरै समस्या भएको भन्दै उहाँले अर्थतन्त्रलाई जसरी उच्च वृद्धि गर्नसक्नुपर्ने थियो त्यसरी गर्न नसकेको बताउनुभयो । विकास निर्माण, शिक्षालगायतमा पनि समस्या भएको उल्लेख गर्दै उहाँले समस्या मात्रै छन् भन्ने भाष्य सत्य नभएको बताउनुभयो । समस्यासँगै नेपालमा प्रशस्तै सम्भावनाहरु पनि भएका गृहमन्त्री लेखकको भनाइ छ ।
अहिले गणतन्त्रले केही दिएन, लोकतन्त्रले केही दिएन भनेर भाष्य निर्माण गर्दै नेपाललाई निरङ्कुशताको जालोमा लैजाने प्रयत्न भइरहेको उहाँले बताउनुभयो । यस्ता गलत भाष्यको जालोमा लोकतन्त्र र गणतन्त्रमा विश्वास गर्नेहरु फस्न नहुने गृहमन्त्री उहाँको भनाइ छ । लोकतन्त्रको विकल्प निरङ्कुश र गणतन्त्रको विकल्प राजतन्त्र हुन नसक्ने उहाँले बताउनुभयो ।
आफू कलेज पढ्ने बेलामा स्नातक पढ्नका लागि काठमाडौँ वा भारत जानुपर्ने बाध्यताको स्मरण गर्दै उहाँले अहिले गाउँगाउँमा उच्च शिक्षा अध्ययन गर्न सकिने वातावरण बनेको बताउनुभयो । अहिले विदेश जानु बाध्यता भएको उल्लेख गर्दै गृहमन्त्री लेखकले देशभित्रै सम्भावना खोज्नुपर्ने बताउनुभयो । देशभित्र स्थापना भएका प्राविधिक धारका विश्वविद्यालयले मुलुकका लागि आवश्यक पर्ने दक्ष जनशक्ति निर्माण गर्ने काममा लागिरहेका उहाँको भनाइ छ ।
कार्यक्रममा सुदूरपश्चिम विश्वविद्यालयका उपकुलपति प्रा डा हेमराज पन्तले प्राविधिक शिक्षा घरआँगनमा पु¥याउनुपर्छ भन्दै आफूहरुले कलेजलाई सम्बन्धन दिइरहेको बताउनुभयो । हाल विश्वविद्यालयसँग एउटा केन्द्रीय क्याम्पस तथा १५ वटा आङ्गिक क्याम्पस र ३१ वटा सम्बन्धन प्राप्त क्याम्पसमा करिब १८ हजार विद्यार्थी रहेको उहाँले बताउनुभयो ।