गैँडाकोट नगरपालिकामा यही फागुन ५ र ६ गते क्षयरोग न्यूनीकरण तथा जनस्वास्थ्य प्रवर्द्धनका लागि निशुल्क एआई प्रविधिबाट छातिको एक्सरे गरिने भएको छ। “क्षयरोग मुक्त गैँडाकोट” अभियानअन्तर्गत अत्याधुनिक प्रविधिको प्रयोग गर्दै परीक्षणको व्यवस्था गरिएको हो।
अभियानका संयोजक नारायण सापकोटाका अनुसार यसअघि खकार संकलनमार्फत मात्र क्षयरोग पहिचान गर्ने प्रविधि प्रचलनमा रहेकामा अब छातिको एआई एक्सरे मार्फत परीक्षण गर्न लागिएको हो। गैँडाकोट वडा नं. २ मा फागुन ५ गते र वडा नं. ७ मा फागुन ६ गते निशुल्क एक्सरे सेवा उपलब्ध हुनेछ। गण्डकी प्रदेशका १९ पालिकामा सञ्चालन भइरहेको यो अभियान नवलपुर जिल्लामा गैँडाकोट र देवचुली नगरपालिकामा लागू गरिएको छ।
जनस्वास्थ्य निरीक्षक प्रकाश पोखरेलले यस परीक्षणबाट क्षयरोग मात्र नभई छातीसम्बन्धी अन्य समस्याहरूको पनि पहिचान गर्न सकिने जानकारी गराउनुभयो। निशुल्क परीक्षण भएकाले नगरपालिकाले सबै नागरिकलाई सहभागी हुन आग्रह गरेको छ।
नगरप्रमुख मदनभक्त अधिकारीले अत्याधुनिक मेसिनको प्रयोगबाट क्षयरोग परीक्षण हुन लागेको उल्लेख गर्दै आफूले पनि चेकजाँच गराउने बताउनुभयो। उहाँले नगरवासीलाई समेत अनिवार्य रूपमा परीक्षण गराउन अनुरोध गर्नुभयो।
यस अभियानलाई प्रभावकारी बनाउन गैँडाकोट नगरपालिकाले आज उपप्रमुख शान्ति कोइराला, स्थानीय जनप्रतिनिधिहरू, महिला स्वास्थ्य स्वयंसेविका तथा स्वास्थ्यकर्मीहरूका लागि अभिमुखीकरण कार्यक्रम आयोजना गरेको थियो। उक्त कार्यक्रमको सहजिकरण जनस्वास्थ्य निरीक्षक माधव आचार्यले गर्नुभएको थियो भने क्षयरोग मुक्त अभियान गण्डकी प्रदेशका संयोजक राजेन्द्र रानाभाटले प्रशिक्षण दिनुभएको थियो।
