एजेन्सी,पुस २४- अस्ट्रेलियाको पश्चिमी सिड्नीको पररामट्टामा बस्दै आएकी ३९ वर्षीया नेपाली नर्स दीक्षा दाहालको मृत्युबारे स्थानीय प्रहरी अधिकारीले नयाँ तथ्य फेला पारेका छन् । ६ दिनअघि गत बिहीबार एउटा भवनको सातौं तलाबाट खसेर उनको निधन भएको थियो । घटना हुनुभन्दा दुई घण्टा अगाडि आपतकालीन नम्बर ००० मा दीक्षा दाहालको अपार्टमेन्टबाट एक फोन गएको थियो ।
फोनमा पृष्ठभूमिको आवाज मात्र आएको आपतकालीन सेवाका अधिकारीहरूले जनाएका छन् । फोनको जवाफ नपाएपछि अधिकारीले पुनः सोही नम्बरमा कल गरेका थिए । त्यसपछि उक्त फोन उनका श्रीमान् लबिन्द्र सुवेदीले उठाएका थिए । तर, त्यसको दुई घण्टापछि घटनास्थल नजिकै एक व्यक्तिले उक्त अपार्टमेन्टको बाल्कोनीमा एक महिलालाई देखे । उनी दाहाल नै थिइन् ।
तत्काल ती व्यक्तिले पुनः आपतकालीन सेवामा फोन गरेर कसैले आत्महत्या गर्न खोजेको बताए । लगत्तै प्रहरी घटनास्थलमा पुगे तर, उनले हाम्फालिसकेकी थिइन् । त्यसपछि दाहाललाई तुरुन्तै अस्पताल पुर्याइएकोमा चिकित्सकले मृत घोषणा गरे । प्रहरीले घटनाको दुई घण्टाअघि आपतकालीन सेवामा आएको फोनको पृष्ठभूमिको आवाजका आधारमा श्रीमान्(श्रीमतीबीच झगडा भएको हुनसक्ने अनुमान गरेका छन् ।
झगडा भएकै कारण दाहालले आत्महत्या गरेको हुनसक्ने कोणबाट प्रहरीले अनुसन्धान गरिरहेको छ । घटनापछि दाहालका पति सुवेदीलाई प्रहरीले पक्राउ गरेर सोधपुछ गरेको थियो । तर, पछि उपस्थित हुने गरी उनी अहिले छुटिसकेका छन् । प्रहरीले यो घटनालाई जटिल अनुसन्धानको रूपमा व्याख्या गरेको छ । घटनापछि सुवेदीसँगै प्रहरीले अपार्टमेन्टका अन्य बासिन्दासँग पनि कुराकानी गरिरहेको छ ।
प्रहरीका अनुसार यसअघि पनि यी दुवैको झगडा हुने गर्दथ्यो । २० दिन पहिला पनि दुवैको झगडा मिलाउँदै प्रहरीले आइन्दा यसो नगर्न चेतावनी दिएको थियो ।
