भरतपुर, २१ पुस । हंस बहुउद्देश्यीय सहकारी संस्था लिमिटेडले भरतपुर–११ गणेशस्थानमा रहेको श्री सिद्धि जनकल्याण आधारभूत विद्यालयमा अध्ययनरत विद्यार्थीलाई लक्षित गरी न्यानो कपडा वितरण गरेको छ ।
संस्थाका अध्यक्ष दिनेशकुमार चुकेको अध्यक्षमा भएको कार्यक्रममा उहाँले सहकारीको एक सिद्धान्त ‘समुदाय प्रतिको चासो’लाई प्राथमिकतामा राख्दै संस्थाले विगतदेखि सामाजिक सेवाका क्षेत्रमा योगदान गर्दै आएको बताउनुभयो । सामाजिक उत्तरदायित्वलाई अझ प्रभावकारी बनाउँदै अघि बढ्ने भन्दै उहाँले यस्तो कार्यक्रमले संस्थालाई समुदायसँग अझ नजिक बनाउने विश्वास व्यक्त गर्नुभयो । संस्थाका उपाध्यक्ष बाबुराम अधिकारीले स्वागत मन्तव्य राख्दै संस्थाको परिचय सहित कार्यक्रमको औचित्य प्रस्ट्याउनुभएको थियो ।
अधिकारीले सहकारीको मुख्य उद्देश्य आर्थिक मात्र नभई सामाजिक क्षेत्रमा पनि योगदान पु¥याउनु भएको उल्लेख गर्दै कार्यक्रमले संस्थाको समाजप्रतिको दायित्वलाई प्रतिबिम्बित गर्ने दाबी गर्नुभयो । विद्यालय व्यवस्थापन समितिका अध्यक्ष शालिकराम सापकोटाले विद्यार्थीहरूको आवश्यकता पूरा गर्दै सामाजिक सेवामा महत्वपूर्ण योगदान दिएकोमा संस्थालाई धन्यवाद दिनुभयो । उहाँले यस्तो सहयोगबाट विद्यार्थीहरूलाई पठनपाठनमा प्रोत्साहन मिल्ने बताउनुभयो ।
कार्यक्रममा संस्थाका प्रबन्धक नारायणप्रसाद सापकोटाले विद्यालयमा अध्ययनरत आर्थिक अवस्था कमजोर रहेका ६० जना विद्यार्थीलाई न्यानो कपडा वितरण गरिएको बताउनुभयो । संस्थाको सहयोगबाट विद्यालयमा अध्ययनरत विद्यार्थीहरूको दैनिक जीवनमा सकारात्मक प्रभाव पार्ने सापकोटाको भनाइ थियो । कार्यक्रममा संस्थाका लेखा समितिका सदस्य कृष्णहरि तिमिल्सेना, सञ्चालक अनिता मैनाली, सूर्य बराल, होमनाथ सापकोटा, लेखा प्रमुख नविना अधिकारी र विद्यालयकी प्रधानाध्यापक कमला पौडेलको उपस्थिति थियो ।