चितवन, १७ भदौ । आयुर्वेदले सम्पूर्ण रोग सन्चो गर्छ भन्ने विषयमा खुल्ला तीज गीत प्रतियोगिता गरिएको छ । वैदिक आयुर्वेद सेवा प्रालि लायन्सचोकको आयोजनामा भरतपुर–६ चोकबजार गरिएको प्रतियोगितामा १६ वटा समूहको सहभागिता रहेको थियो ।

‘आयुर्वेदले सम्पूर्ण रोग सन्चो गर्छ’ भन्ने विषयका साथ आइतबार भएको प्रतियोगितामा मध्यविन्दु टोल विकास संस्था समूह पहिलो हुँदै ३० हजार रुपैयाँ पुरस्कार हात पारेको छ । प्रतियोगितामा आनन्द दिदी बहिनी समूह दोस्रो हुँदै १५ हजार रुपैयाँ तथा वैदिक सनातन सांस्कृतिक समूह टोल तेस्रो हुँदै १० हजार रुपैयाँ पुरस्कार हात पारेका छन् । प्रतियोगितामा शान्तिनगर महिला समूह र मिलिजुली महिला समूहले प्रोत्साहन पुरस्कारवापत पाँच÷पाँच हजार रुपैयाँ पुरस्कार हात पारेका वैदिक आयुर्वेद सेवा प्रालिका प्रबन्ध निर्देशक चक्रपाणि न्यौपानेले जानकारी दिनुभयो ।

भरतपुर–६ का वडाध्यक्ष कृष्णलाल श्रेष्ठले कार्यक्रमको उद्घाटन गर्नुभएको थियो । कार्यक्रममा श्रेष्ठले पछिल्लो समय महिनौँ अगाडिदेखि ठूला होटलमा गएर भड्किलो रुपमा तीज मनाउने संस्कृति बढेको भन्दै यसले विकृति भित्रिएको बताउनुभयो । तीजको गीतमार्फत तीजलाई विकृति होइन संस्कृति हो भनेर सन्देश दिनु जरुरी रहेको उहाँले बताउनुभयो । वैदिक आयुर्वेद सेवा प्रालिले स्वास्थ्यलाई मूल विषय बनाएर मानव स्वास्थ्यप्रति सचेतना फैलाउने गरी तीज गीत प्रतियोगिताको आयोजना गर्नुले समाजमा प्राचीन आयुर्वेदका माध्यमबाट महत्वपूर्ण सन्देश प्रवाह भएको श्रेष्ठको भनाइ छ ।
यसैबीच, प्रतियोगिताकै अवसरमा वैदिक आयुर्वेद सेवा प्रालिबाट औषधि सेवन गरी पूर्ण रुपमा निको भएका व्यक्तिहरुलाई सम्मान गरिएको थियो । तीज गीत प्रतियोगिताको निर्णायक मण्डलमा संचारकर्मी एवं संगीतकर्मी मधुसुन घिमिरे, वरिष्ठ भजन गायक हीरालाल कँडेल र वैदिक आयुर्वेद सेवा प्रालिका सञ्चालक सविता न्यौपाने रहनुभएको थियो । वैदिक आयुर्वेद सेवा प्रालिका प्रबन्ध निर्देशक चक्रपाणि न्यौपानेको अध्यक्षतामा भएको कार्यक्रममा वैदिक आयुर्वेद सेवा प्रालिका व्यवस्थापक एवं कार्यक्रमका संयोजक भागवत लामिछानेले स्वागत गर्नुभएको थियो ।