चितवन, १५ भदौ । भरतपुर–१ को नारायणगढ स्थित बालकुमारी कन्या माविमा अध्ययनरत विद्यार्थीहरुलाई महिनावारी स्वच्छता सम्बन्धी सचेतना प्रदान गरिएको छ । लायन्स क्लब अफ नारायणगढ बालकुमारी तथा रोट्रयाक्ट क्लब अफ भरतपुरको संयुक्त आयोजनमा शुक्रबार विद्यार्थीहरुलाई सचेतना प्रदान गरिएको हो ।

विद्यालयको कक्षा ८ देखि १० सम्म अध्ययनरत छात्राहरुलाई लक्षित गरी सचेतना कार्यक्रम सञ्चालन गरिएको लायन्स क्लब अफ नारायणगढ बालकुमारीका अध्यक्ष शेर बहादुर पौडेलले जानकारी दिनुभयो । विद्यार्थीहरुलाई श्रव्यदृश्य मार्फत महिनावारी स्वच्छताबारे जानकारी गराउँदै यौवन अवस्थादेखि रजोनिवृत्तिसम्मको अवस्थाबारे जानकारी गराइएको पौडेलले बताउनुभयो । किशोरावस्थापछि गर्भावस्थाबाहेक हरेक २८ दिनको अन्तरालमा महिलाहरुको यौनीमार्फत आंशिक रगत आंशिक तन्तु निर्वहन गर्ने महिलाहरुमा हुने प्रकृयाको बारेमा बुझाइएको उहाँको भनाइ छ ।

सहजकर्ताद्वय आश्ना अवस्थी तथा दीपा मेहेताले महिनावारीको समयमा हुने रगत तथा तन्तु संकलन गर्न सफा सामग्री जस्तैः सेनिटरी प्याड, ट्याम्पन, मेन्स्ट्रुअल कप, आदिको उपलब्धताबारे छात्राहरुलाई प्रशिक्षण दिनुभएको थियो । महिनावारीको समयमा हुने पीडा, ऐंठन, बान्ता तथा अन्य जटिल स्वास्थ्य समस्याका लागि स्वास्थ्य सेवाको उपलब्धताबारे उहाँहरुले जानकारी दिनुभएको थियो । महिनावारीको समयमा आवश्यकता अनुसार रगत तथा तन्तु संकलन गर्ने सामग्री गोपनीयताका साथ परिवर्तन गर्न पाउने सफा पानी र स्वच्छ वातावरण सहितको संरचना (शौचालय)को उपलब्धता संकलन गर्न प्रयोग भएका सामग्रीको सुरक्षित व्यवस्थापनको उपलब्धताका बारेमा जानकारी गराउनुभएको थियो ।
महिनावारी स्वच्छता अपनाउँदा हुने फाइदाहरु पिसाब मार्ग संक्रमणको जोखिम कम हुने, यौनांगमा खटिरा/डाबरहरूको विकास नहुने, स्वस्थ प्रजनन प्रणालीको सुनिश्चितता, पाठेघरको मुखको क्यान्सरको जोखिम कम हुने लगायतको बारेमा जानकारी गराइएको लायन्स क्लब अफ नारायणगढ़ बालकुमारीका सदस्य एवम् कार्यक्रम संयोजक ओम प्रकाश पौडेलले जानकारी दिनुभयो । लायन्स क्लब अफ नारायणगढ़ बालकुमारीका अध्यक्ष शेरबहादुर पौडेलको अध्यक्षतामा भएको कार्यक्रममा रोट्रयाक्ट क्लब अफ भरतपुरका उपाध्यक्ष प्रवेश मिश्र सहअध्यक्ष रहनुभएको थियो । कार्यक्रममा बालकुमारी कन्या माविका विद्यालय व्यवस्थापन समितिका अध्यक्ष बालगोपाल चुके प्रमुख अतिथि तथा विद्यालयका सहायक प्रधानाध्यापक विष्णु प्रसाद वाग्ले विशिष्ट अतिथि रहनुभएको थियो ।