चितवन, भदौ १२–  चितवन जिल्ला क्रिकेट संघ (क्याक) को आयोजना र चितवन मेडिकल कलेज (सिएमसी)को मुख्य प्रायोजनामा भदौ १४ गतेदेखि प्रथम सिएमसी ‘इण्डोर कर्पोरेट कप’ लिग क्रिकेट हुने भएको छ ।

आयोजक क्रिकेट संघले आज भरतपुरमा पत्रकार सम्मेलन गरी प्रतियोगिताको तयारी पूरा भएको जानकारी दिएको हो । संघका अध्यक्ष सुदिप पियाले प्रतियोगिताको सबै तयारी पूरा भएको र चितवन र नवलपुरसहितका कुल १६ वटा कर्पोरेट टिमले सहभागिता जनाउने जानकारी दिए । उनले संघ र यहाँका कर्पोरेट संस्थाहरुसंग सम्बन्ध मजबुत बनाउनुका साथै चितवनको टिमलाई मुम्बई लैजाने बाटोको रुपमा प्रतियोगिता आयोजना गरिएको बताए ।

सो क्रममा बोल्दै चितवन मेडिकल कलेजका प्रमुख कार्यकारी अधिकृत (सिइओ) प्रताप देवकोटाले स्वास्थ्यका लागि खेलकुद भन्ने नारालाई सार्थकता तुल्याउन क्रिकेटमा सहयोग गरिएको बताए । उनले विगतमा पनि अस्पतालले सामाजिक उत्तरदायित्व अन्तरगत विभिन्न खेलकुदका कार्यक्रममा सहभागिता जनाएको भन्दै यसलाई निरन्तरता दिने स्वरुप यो प्रतियोगितामा सहकार्य गरिएको बताए । सिएमसीले यसअघि चितवनमा पहिलोपटक नारायणी इभेन्ट्सको सहकार्यमा चितवन प्रिमियर लिग (सिपिएल) क्रिकेट प्रतियोगिता आयोजना गरेको थियो ।

पत्रकार सम्मेलनमा बोल्दै चितवन जिल्ला क्रिकेट संघका सल्लाहकार एवं सेन्ट्रल कलेज अफ भोकेशनल ट्रेनिङ प्रा.लि.का प्रिन्सिपल वाइबी पौडेलले खेलकुद क्षेत्रमा मेडिकल क्षेत्रबाट पनि सहकार्य हुनु राम्रो पक्ष रहेको बताए । उनले आगामि दिनमा पनि यस्तै सहयोग र सहकार्य हुन आवश्यक रहेको औल्याए ।

पत्रकार सम्मेलनमा प्रतियोगिताका विजेता र उपविजेताले पाउने आकर्षक ट्रफी सार्वजनिक गरिएको थियो । विजेताले नगद ५० हजार रुपैयाँ, उपविजेताले नगद २५ हजार रुपैयाँ, ट्रफी, मेडल प्राप्त गर्नेछन् । यस्तै प्रतियोगिता आयोजनाका लागि सिएमसी र चितवन क्रिकेट संघबीच सम्झौता पत्रमा हस्ताक्षर समेत गरिएको थियो । संघका सचिव सुरज ज्ञवालीले प्रेश विज्ञप्ती बाचन गरेका थिए ।

यस प्रतियोगिताको प्रत्यक्ष प्रशारण नारायणी खेल लाइभले गर्ने छ । संघ र नारायणी खेल लाइभबीच प्रत्यक्ष प्रशारणका लागि यसअघि नै सम्झौता भइसकेको छ । प्रतियोगिता भरतपुर–३, स्थित क्यासी स्पोर्टस् एण्ड रिक्रियशनल सेन्टरमा प्रतियोगिता हुन लागेको हो ।