नवलपुर, १० भदौ । नवलपुरको गैँडाकोटमा रहेको लियो क्लब अफ गैँडाकोट मौलाकालिकाले विद्यार्थीहरुलाई साइबर अपराध (क्राइम) सम्बन्धी सचेतना प्रदान गरेको छ ।
क्लबले आइतबार गैँडाकोट–८ स्थित कालिका माध्यमिक विद्यालयका विद्यार्थीहरुलाई साइबर अपराध सम्बन्धी सचेतना प्रदान गरेका हुन् । इलाका प्रहरी कार्यालय गैँडाकोटसँगको सहकार्यमा गरिएको सचेतना कार्यक्रममा इलाका प्रहरी कार्यालय गैँडाकोटका प्रमुख प्रहरी निरीक्षक हस्तबहादुर सुनार तथा प्रहरी सहायक निरीक्षक रनबहादुर शाहीले प्रशिक्षण दिनुभएको थियो । विद्यार्थीहरुलाई साइबर अपराध, कानुनी व्यवस्था र रोकथामको बारेमा प्रशिक्षण दिइएको प्रहरी निरीक्षक सुनारले जानकारी दिनुभयो ।
क्लबका अध्यक्ष युवराज सापकोटाको अध्यक्षतामा भएको कार्यक्रममा गैँडाकोट–८ का वडाध्यक्ष प्रेम सापकोटा प्रमुख अतिथि रहनुभएको थियो । कार्यक्रममा लियो एडभाइजर कृष्ण रिजाल, कालिका माध्यमिक विद्यालय व्यवस्थापन समितिका अध्यक्ष गंगाधर सापकोटा, विद्यालयका प्रधानाध्यापक होमनाथ शर्मा, सामुदायिक सेवा केन्द्रका रिशमबहादुर पुलामी, क्लबका नवीन पौडेल तथा मुकिमदिन मिँयाको उपस्थिति रहेको थियो । कार्यक्रमलाई इन्टरनेशनल करियर काउन्सिलिङ सेन्टर चितवनले सहयोग गरेको थियो ।
