नवलपुर, ८ भदौ । नवलपुरको गैँडाकोट नगरपालिका वडा नम्बर ५ ले आर्थिक वर्ष २०८०/८१ मा गरेका विभिन्न गतिविधिको सार्वजनिक सुनुवाइ गरेको छ ।
वडा कार्यालयले आज गैँडाकोट–५ को गणेश मन्दिर परिसरमा सार्वजनिक सुनुवाइ गरेको हो । कार्यक्रममा वडाध्यक्ष रत्नप्रसाद सापकोटाले आर्थिक वर्ष २०८०/८१ मा वडा कार्यालयले गरेका विभिन्न काम तथा चालु आर्थिक वर्ष २०८१/८२ मा गरिने कामको बारेमा जानकारी गराउनुभएको थियो । सार्वजनिक सुनुवाइका क्रममा १८ जना वडावासीले वडा कार्यालयका गतिविधि, विकास निर्माण र समस्याका बारेमा प्रश्न गरेका थिए ।
वडावासीको प्रश्न तथा जिज्ञासाको समाधान नगरपालिकाका प्रमुख प्रशासकीय अधिकृत झविन्द्र खनाल र वडाध्यक्ष सापकोटाले गर्नुभएको थियो । सार्वजनिक सुनुवाइले वडावासी र सार्वजनिक पद धारण गरेका व्यक्तिसँगको सम्बन्ध स्थापित गर्न सहयोग गर्नुका साथै जनप्रतिनिधिलाई थप उत्तरदायी बनाउन मद्दत गरेको वडाध्यक्ष सापकोटाले बताउनुभयो । सार्वजनिक सुनुवाइ कार्यक्रममा वडावासीहरुको उत्साहजनक सहभागिता रहेको वडाध्यक्ष सापकोटाले बताउनुभयो ।
कार्यक्रममा नेपाली काँग्रेस गैँडाकोट–५ का वडा सभापति लक्ष्मण कार्की, नेकपा एमाले गैँडाकोट–५ का अध्यक्ष कलाधर रिजाल, वडास्तरीय टोल विकास संस्था सञ्जालका अध्यक्ष ठानेश्वर रिजाललगायतले मन्तव्य राख्नुभएको थियो । कार्यपालिका सदस्य शान्ति न्यौपानेले स्वागत तथा वडा स्तरीय टोल विकास संस्था समन्वय समितिका सदस्य गोविन्द घिमिरेले सञ्चालन गर्नुभएको कार्यक्रममा गैँडाकोट नगरपालिका न्यायिक समिति सदस्य एवम् वडा सदस्य द्रोण वन सन्यासी, वडा सदस्य तुलसीराम गौतम, वडा सदस्य उषा परियारलगायतको उपस्थिति रहेको थियो ।