चितवन, १ भदौ । सामाजिक क्षेत्रमा क्रियाशीलता देखाउँदै आएका चितवनका एक चिकित्सक दम्पतीले फाउन्डेसन स्थापना गरेका छन् । वरिष्ठ दन्तरोग विशेषज्ञद्वय डा अजय न्यौपाने र डा सरु थापाले ‘डा अजय एण्ड डा सरु फाउण्डेसन’ स्थापना गरेका हुन् ।

फाउन्डेसन स्थापनाको जानकारी दिँदै डा न्यौपानेले स्वास्थ्य, शिक्षा, विपद्, कला संस्कृति, खेलकुदलगायत क्षेत्रमा काम गर्ने बताउनुभयो । हप्ताको सातै दिन दम्पतीले नै काम गरेर त्यहाँबाट भएको आफ्नै आम्दानीले फाउन्डेसनमार्फत सामाजिक काम गर्ने उहाँले जानकारी दिनुभयो । वार्षिक रु १० लाख अक्षय कोषमा राख्दै जाने र चालु पुँजीका रुपमा यस आर्थिक वर्षमा रु १० लाख छुट्याएको उहाँले बताउनुभयो ।

अक्षय कोषमा राखिएको पैसा नचलाउने तर, चालु पुँजीबाट फाउन्डेसनले काम गर्ने न्यौपानेले बताउनुभयो । आउँदो वर्षबाट कोषको ब्याजबाट प्राप्त रकममा अरु रकम थपगरी त्यही पैसाबाट फाउन्डेसनले सामाजिक काम गर्ने उहाँको भनाइ छ । दश वर्षमा अक्षयकोष रु एक करोड पु¥याउने लक्ष्य राखेको भन्दै डाक्टर न्यौपानले सामाजिक काममा अन्य सङ्घसंस्थासँग सहकार्य गरिने तर, फाउन्डेसन सञ्चालनका लागि अरुसँग आर्थिक सहयोग नलिइने बताउनुभयो । अक्षय कोषबाट प्राप्त व्याजले अपुग हुँदा आफूहरुले आर्जन गरेको रकम राखेर सामाजिक काम गर्ने दम्पतीको योजना छ ।
फाउन्डेसनले बर्सेनि २० विद्यार्थीलाई प्रति विद्यार्थी १० हजार रुपैयाँका दरले छात्रवृत्ति दिने, पाँच शिक्षकलाई १० रुपैयाँका हजारका दरले प्रोत्साहन पुरस्कार दिने योजना छ । छात्रवृत्ति सामुदायिक विद्यालयमा अध्ययन गर्ने गरिब, विपन्न तथा मेधावी विद्यार्थीलाई प्रदान गरिने भन्दै न्यौपानेले सामुदायिक विद्यालयकै उत्कृष्ट शिक्षकहरुलाई पुरस्कृत गरिने जानकारी दिनुभयो । छात्रवृत्ति र पुरस्कार रकम अन्य व्यक्ति तथा संस्थाबाट नभइ आफूहरुले नै मूल्याङ्कन गरी प्रत्यक्षरुपमा प्रदान गर्ने उहाँले बताउनुभयो ।
स्वास्थ्य क्षेत्रमा विपन्नलाई आँखाको उपचार गर्न सहयोग गर्ने, स्वास्थ्य पहुँचमार्फत गाउँगाउँमा पुगेर शिविरमार्फत सेवा दिने, आकस्मिक स्वास्थ्य सहयोग गर्नेलगायत उहाँहरुको योजना छ । ग्रामीण क्षेत्रका विपन्न २० परिवारलाई निःशुल्क स्वास्थ्य बिमा गरिदिने फाउन्डेसनको योजना रहेको डा सरु थापाले बताउनुभयो । सुरुका वर्षमा गाउँपालिकामा यी कार्यक्रम सञ्चालन गर्ने योजना फाउन्डेसनको छ ।
फाउन्डेसनका सञ्चालक चिकित्सक दम्पतीले हालसम्म ७० हजार भन्दा बढीको दाँत तथा मुखको उपचार गरिसकेको बताउनुभयो । उहाँहरुले उपचार गरेका बिरामीमध्ये विभिन्न स्वास्थ्य शिविरमा आधाभन्दा बढी रहेका थापाको भनाइ छ । आगामी दिनमा फाउन्डेसनले सञ्चालन गर्ने शिविरमा सबै प्रकारको विशेषज्ञ शिविर हुने उहाँहरुको भनाइ छ ।