चितवन, ३० साउन । संघ संस्थाको निर्वाचनमा उम्मेदवार हुन कति शुल्क तिर्नु पर्ला ? शुल्क सुनेर अचम्म भने मान्नुपर्दैन । अनि उम्मेदवार हुने व्यक्तिले मनोनयन शुल्क तिरेपछि मात्रै उम्मेदवार बन्न योग्य हुन्छन् भन्ने पनि थाहा होला नि ।

तर, चितवनमा भने अचम्म भएको छ । अध्यक्षको उम्मेदवार हुन दिनुपर्ने शुल्क १० महिनासम्म भुक्तानी नगरेको घटना हामीले पाएका छौँ । चितवन उद्योग सङ्घको अध्यक्ष भएको १० महिनासम्म पनि सूर्यप्रसाद न्यौपानेले पूरा शुल्क तिरेका छैनन् । अध्यक्ष हुनका लागि सूर्यप्रसाद न्यौपानेले मनोनयन शुल्क रु ६ लाख ५० हजार चेकमार्फत भुक्तानी गरेका थिए । उनी अध्यक्ष पनि भए । तर, उनको चेक साटिएन । पटक पटक ताकेता गर्दा पनि उनले दिएको चेक साटिँदै साटिएन ।

विसं २०८० असोजमा भएको संघको ३२औं वार्षिक साधारण सभा एवम् १७औं अधिवेशनबाट सूर्यप्रसाद न्यौपाने अध्यक्षमा चुनिएका थिए । अध्यक्ष हुन दिएको चेक अध्यक्ष भएको लामो समयसम्म पनि साटिएन । यो विषय सार्वजनिक पनि भएन । केही दिन अघि हामीलाई प्राप्त गोप्य सूचनाका आधारमा हामीले यस विषयमा स्विट नेपालले अध्ययन सुरु गर्‍याे । संघका कर्मचारीहरुले अध्यक्षको चेक नसाटिएको विषयमा बोल्न मानेनन् । लेखा शाखाका कर्मचारीले समेत संस्थाको गोप्य कुरा बाहिर ल्याउन नमिल्ने बताए ।
स्रोतका अनुसार अध्यक्ष न्यौपानेले दिएको चेक नसाटिएपछि उनले पटक पटक गरेर पैसा नगदमा तिर्दै आएका छन् । उनले अध्यक्ष हुँदा बुझाउनुपर्ने शुल्क १० महिना बितिसक्दा पनि संघलाई अझै कम्तिमा ५० हजार रुपैयाँ भुक्तानी गर्न बाँकी रहेको छ । उनले भुक्तानी गर्न बाँकी रहेको पैसा साउन २९ गते तिर्ने भनिए पनि संघको खातामा प्राप्त नभएको स्रोतले दाबी गरेको छ ।
मनोनयन शुल्क पूरै भुक्तानी नभएको विषयमा अध्यक्ष सूर्यप्रसाद न्यौपानेसँग बुझ्न खोज्दा आफू जिल्ला बाहिर भएको र आफूले भुक्तानी गर्नुपर्ने शुल्कबारे थाहा नभएको प्रतिकृया दिए । न्याैपाने आर्थिक रुपमा समेत अपारदर्शी व्यक्ति भएको उनी निकटका व्यक्तिहरुको भनाइ छ ।