चितवन, २४ साउन । चितवनको भरतपुरमा मुख्य कार्यालय रहेको सेन्ट्रल कलेज अफ भोकेसनल ट्रेनिङ प्रालिले विविध कार्यक्रम गरी वार्षिकोत्सव मनाउने भएको छ । कलेजले १६औं वार्षिकोत्सवको अवसरमा साउन २५ गते विविध कार्यक्रम आयोजना गर्न लागेको बिहीबार आयोजित पत्रकार सम्मेलनमा जानकारी दिइएको छ ।
सेन्ट्रल टावरमा आयोजित पत्रकार सम्मेलनमा कलेजका प्रिन्सिपल वाईबी पौडेलले भरतपुर ओरालोस्थित कलेजको आफ्नै भवन सेन्ट्रल टावरमा भवनको उद्घाटनसँगै कार्यक्रमको औपचारिक उद्घाटन गर्ने बताउनुभयो । त्यसैगरी, सेन्ट्रल ग्रुपद्वारा सञ्चालित सेन्ट्रल मोडल कलेजको पनि शुक्रबार नै उद्घाटन गरिने पौडेलले बताउनुभयो । सेन्ट्रल मोडल कलेजले यसवर्षदेखि त्रिभुवन विश्वविद्यालयबाट सम्बन्धन प्राप्त शैक्षिक कार्यक्रमहरु सञ्चालनमा ल्याएको छ ।
कलेजले पढ्दै कमाउँदै गर्ने वातावरण तयार गर्दै अध्ययन पश्चात रोजगारी समेत दिलाउने कलेजका कार्यक्रम संयोजक समेत रहनुभएका पौडेलले जानकारी दिनुभयो । अत्याधुनिक ल्याब, स्मार्ट बोर्ड र एसीसहितका कक्षा कोठामा अध्यापन गराइने उहाँले बताउनुभयो । कलेजले विद्यार्थीका लागि निःशुल्क बसको समेत ब्यवस्था गरेको छ । अर्को वर्ष मास्टर डिग्रीको कक्षा पनि सञ्चालनको योजना रहेको उहाँले बताउनुभयो । यस्तै निकट भविष्यमा नै कक्षा १ देखि १२ सम्मको कक्षा पनि सञ्चालन गर्ने उहाँले बताउनुभयो ।
वार्षिकोत्सवको अवसरमा शुक्रबार बिहान कार्यालय परिसरमा रक्तदान कार्यक्रम आयोजना गरिने पौडेलले बताउनुभयो । त्यस्तै चितवन नवलपुर र तनहुँका दुई सय भन्दा बढी फुटबल, क्रिकेट तथा भलिबल क्लबहरुलाई खेल सामग्री हस्तान्तरण गर्ने पौडेलले जानकारी दिनुभयो । शुक्रबार नै चर्चित कलाकारहरुको साथमा सांस्कृतिक कार्यक्रम हुनेछ ।
कार्यक्रममा चर्चित लोक तथा दोहोरी गायक पशुपति शर्मा, नेपाल आइडल विजेता करण परियार र कमेडी च्याम्पियन सुनिल खड्काको प्रस्तुति रहने बताइएको छ । वार्षिक साधारण सभा, सेन्ट्रल कलेजसँग सम्बन्धित म्युजिक भिडियो र पत्रकार र सञ्चार माध्यमलाई सम्मान, सामाजिक संघ संस्थाहरुलाई सम्मानलगायतका कार्यक्रम पनि हुने प्रिन्सिपल पौडेलले बताउनुभयो ।
