रोशन दर्लामी
चितवन, १२ साउन । नेपाल वादोरियो कराँते डो संघ चितवनमा अनिल उपरकोटीको अध्यक्षतामा नयाँ नेतृत्व चयन गरिएको छ । शनिबार कालिका नगरपालिका–८ को गैरीबारीमा भएको प्रथम जिल्ला अधिवेशनले उपरकोटीको अध्यक्षतामा नौ सदस्यीय नयाँ कार्यसमिति चयन गरेको हो ।
समितिको उपाध्यक्षमा भोजराज पनेरु, सचिवमा सुरज मगर, कोषाध्यक्षमा युनेष पाण्डे चयन भएका छन् । कार्यसमितिको सदस्यहरुमा सुरज सुनार, दिलिप कुमाल, मेनुका तामाङ, विपीन गुरुङ, सुरेश मगर, शनिष कुमाल चयन भएका छन् । समितिको प्रमुख सल्लाहकारमा कपील पाण्डेलाई चयन गरिएको छ ।
कार्यक्रमको उद्घाटन समारोहमा नेपाल वादोरियो कराँते डो संघ केन्द्रीय अध्यक्ष हरिशरण केसीले नेपालमा खेलकुदको सम्भावना राम्रो भए पनि राज्यले उपेक्षा गरेको बताउनुभयो । खेलाडीहरुले खेलमार्फत देशको नाम विश्वभर फैलाउने भएपनि राज्यले खेलकुद क्षेत्रमा पर्याप्त बजेट विनियोजन गर्न नसकेको बताउनुभयो । विद्यालय तहबाट नै खेलकुदबारे विद्यार्थीहरुलाई अध्ययनसँगै प्रशिक्षण दिनुपर्ने केसीको भनाइ छ ।
कार्यक्रमका विशिष्ट अतिथि सोतोकान कराँते संघका शैलेश थापा, नेपाल कराँते महासंघ बागमती प्रदेश सहसचिव एवम् चितवन जिल्ला सचिव चित्रबहादुर राना मगर, सितेरियो कराँते संघका छवि रमण तिमिल्सिना, गजुरियो कराँते संघ चितवनका अध्यक्ष राजु पौडेललगायतले शुभकामना मन्तव्य राख्नुभएको थियो । कार्यक्रममा नेपाल वादोरियो कराँते डो संघका महासचिव प्रतिक्षा श्रेष्ठ, नेपाल वादोरियो कराँते डो संघका केन्द्रीय सदस्य तथा भक्तपुर जिल्ला अध्यक्ष गणेशप्रसाद लोहला, वरिष्ठ कराँते प्रशिक्षक रेमश श्रेष्ठलगायत अतिथिहरुको उपस्थिति रहेको थियो । जिल्ला खेलकुद विकास समिति चितवनकाका कार्यालय प्रमुख रामजी ढकालको अध्यक्षतामा भएको थियो ।
