नवलपुर । किसान बचत तथा ऋण सहकारी संस्था लिमिटेडले गैँडाकोट ८ लाई पूर्ण किसान सदस्य वडा घोषणा गर्दै स्थानीय समुदायमा सहकारी अभियानको नयाँ इतिहास रचेको छ । यस घोषणाले स्थानीय समुदायमा सहकारी अवधारणाप्रति विश्वास बढ्न गई सहकारीको भूमिका अझ महत्वपूर्ण बन्न पुगेको छ ।

६७ औं राष्ट्रिय सहकारी दिवसका अवसरमा गरिएको विशेष समारोहमा गैँडाकोटका नगरप्रमुख मदनभक्त अधिकारीले गैँडाकोट ८ लाई पूर्ण किसान सदस्य वडा घोषणा गर्दै आफ्नो समुदायमा सहकारी अभियान चलाउन आग्रह गर्नुभएको छ । उहाँले सहकारी अभियानमा सहभागी भएर निम्न आय भएका नागरिकको जीवनस्तर उकास्न सकिने बताउनुभयो ।

९ सय ६६ घरधुरीमध्ये ९ सय ४८ घरधुरी संस्थाको सदस्य भइसकेकोले यसले संस्थाको दिगो विकास र समुदायमा सहकारी अभियानको सफलतालाई देखाउने अध्यक्ष भोजराज पौडेलले बताउनुभएको छ । उहाँले आफ्नै संस्थामा आर्थिक कारोबार गर्न समेत सबैलाई आग्रह गर्नुभएको छ ।

नगरउपप्रमुख शान्ति कोइरालाले सहकारीको भूमिका महिलाहरूको आर्थिक उन्नतिमा अत्यन्त महत्वपूर्ण रहने बताउनुभएको छ । सहकारीले महिलालाई लगानीका क्षेत्रहरू प्रदान गरी आर्थिक स्वावलम्बन प्रदान गर्न सक्ने उहाँको धारणा छ ।

गैँडाकोट ८ का वडा अध्यक्ष प्रेम सापकोटाले २७ वर्षअघि गैँडाकोट ८ मै कार्यालय स्थापना गरेर सुरु भएको किसान सहकारीले यसरी आफ्नै वडालाई पूर्ण किसान वडा बनाउन सक्नुमा संस्थाको बलियो आधार रहेको बताउनुभएको छ । यसले सहकारीको भविष्य उज्ज्वल रहेको देखाउँछ ।

कार्यक्रममा प्रसिद्ध कलाकार उमादेवी खनाल र दुर्गा सापकोटाको प्रस्तुति समेत रहेको थियो भने ११ वटा टोललाई डस्टबिन वितरण गरिएको थियो । सहकारी र स्थानीय सरकारबीचको सहयोग र समन्वयले सबैलाई फाइदा पुर्याउने देखिन्छ ।

विजय नगर सेवा केन्द्रका संयोजक डिलाराम सापकोटाले स्वागत मन्तव्य राख्नुभएको यस कार्यक्रममा संस्थाका निवर्तमान अध्यक्ष श्रीहरी चालिसेले कार्यक्रमको औचित्य बारे प्रकाश पार्नुभएको थियो भने संचालन संस्थाकी सचिव सरस्वती कंडेलले गर्नुभएको थियो । यसरी समुदायमा सहकारी अभियानलाई अगाडि बढाउनु नै सबैको मुख्य लक्ष्य देखिन्छ ।