भरतपुर – हानामी अन्तर विद्यालय फुटबलमा ग्रीन ल्याण्ड पब्लिक स्कुल र कालिका स्कुल विजयी भएका छन् ।
भरतपुर १० स्थित गेस्ट हाउस चौरमा भएको आजको पहिलो खेलमा ग्रीन ल्याण्डले स्टेप बाई स्टेप इंग्लिस स्कुललाई १-० ले हरायो । ग्रीन ल्याण्डको जितमा प्रज्वल लम्सालले गोल गरे ।
प्रतिस्पर्धात्मक खेलको पहिलो हाफको २१ औं मिनेटमा ग्रीनल्याण्डले गोल गर्दै अग्रता लियो । ग्रीनल्याण्डका प्रज्वलले गोल गरे । बाँकी समयमा थप गोल हुन सकेन र ग्रीनल्याण्ड विजयी भयो । ग्रीनल्याण्डको जितमा निर्णायक गोल गरेका प्रज्वल म्यान अफ दि म्याच चुनिए ।
यस्तै आजको दोस्रो खेलमा कालिका स्कुल विजयी भयो । रोमाञ्चक खेलमा कालिकाले सृजना इंग्लिस स्कुललाई सडन डेथमा निराश बनायो । निर्धारित समयमा १-१ को बराबरी भएपछि खेल टाइब्रेकरमा धकेलिएको थियो ।
टाइब्रेकरमामा पनि ५-५ को बराबरी भएपछि खेल खेलको निर्णय सडन डेथमा भयो । सडन डेथ पनि निकै रोमाञ्चक बनेको थियो । कालिकाका क्षितिज महतो म्यान अफ दि म्याच चुनिए ।
आजको खेलसँगै प्रतियोगिताको पहिलो चरण सकिएको छ । प्रतियोगितामा आइतबारदेखि दोस्रो चरणको खेलहरु सुरु हुनेछ । सोमबार पहिलो खेलमा दिउँसो ४ बजे मुनलाइट स्कुल वीरगन्ज र ब्राइट स्टार स्कुल भिड्नेछन् । ब्राइटस्टार नारायणी पब्लिकलाई पराजित गर्दै दोस्रो चरणमा प्रवेश गरेको हो भने मुनलाइटले बाई पाएको थियो ।
दोस्रो खेलमा अपरान्ह ५ बजे वाल्मीकी शिक्षा सदन र आदर्श पब्लिक स्कुल भिड्नेछन् । वाल्मीकी पोलार स्टारलाई तथा आदर्श पब्लिक उषा स्कुललाई पराजित गर्दै दोस्रो चरणमा प्रवेश गरेका हुन् ।
भरतपुर फुटबल क्लब र यात्रा ग्रुपको आयोजनामा जारी प्रतियोगिता असार २ गतेसम्म सञ्चालन हुनेछ । प्रतियोगिताको विजेताले २० हजार रुपैयाँसहित ट्रफी प्राप्त गर्नेछ । यस्तै उपविजेताले दश हजार रुपैयाँ र ट्रफी प्राप्त गर्नेछन् ।
