गैँडाकोट  – गैँडाकोट दोस्रो नगरस्तरीय मेयरकप फुटवलको उपाधि गैँडाकोट १४ ले जितेको छ ।

आज (शनिबार) सम्पन्न फाइनलमा गैँडाकोट  १० लाई निराश बनाउदै गैँडाकोट १४ ले उलाधि उचालेको हो । गैँडाकोट १४ ले गैंडाकोट १० लाई टाइब्रेकरमा पराजित गर्‍यो ।निर्धारित समयमा कुनैपनि गोल नभएपछि खेल टाइब्रेकरमा धकेलिएको थियो । टाइब्रेकरमा गैँडाकोट १० लाई ३ का विरुद्ध ५ गोल गर्दै गैँडाकोट १४ विजयी भएको हो ।

विजेता बनेको गैँडाकोट १४ ले ५० हजार नगद सहित शिल्ड, मेडल र प्रमाणपत्र प्राप्त गरेको छ । उपविजेतामा गैँडाकोट  १० ले  ३५ हजार नगद सहित शिल्ड, मेडल र प्रमाणपत्रमा चित्त बुझाएको छ ।

विजयी समूह सहित उत्कृष्ट खेलाडी तथा सर्वाधिक गोलकर्तालाइ कार्यक्रमका प्रमुख अतिथि गैँडाकोट नगरपालिकाका नगर प्रमुख मदनभक्त अधिकारीले पुरस्कार वितरण गर्नुभयो ।  “स्वास्थ्यको लागि खेलकुद, राष्ट्रको लागि खेलकुद” भन्ने मुल नाराका साथ जारी नगरस्तरीय मेयरकप फुटवलमा नगरका १८ वटै वडाका २३ वर्ष मुनिका प्रतियोगीहरु सहभागी भएका थिए ।