चितवनः शहरी बिकास मन्त्री बिक्रम पाण्डेले निर्माण व्यवसायीहरुमा एकता र एकरुपताको खाँचो रहेको बताउनु भएको छ । निर्माण व्यवसायी संघ चितवनको २९ औं बार्षिक साधारण सभालाई आज यहाँ सम्बोधन गर्दै उहाँले व्यवसायीहरुलाई एक भएर राम्रो काम गर्नु पर्ने बताउनुभएको हो ।
व्यवसायीहरु एक जुट हुन नसक्दा निर्माण व्यवसायीहरुको समस्या समाधान हुन नसकेको बताउनुभयो । अहिले साना व्यवसायीमा समस्या देखिएको भन्दै उहाँले महासंघले सबै व्यवसायीहरुलाई एक रुपमा हेर्नु पर्ने बताउनुभयो ।
उहाँले व्यवसायीहरुलाई भन्नुभयो “ समयमा गुणस्तरीय काम गर्नुस राज्यले तपाईहरुलाई सहयोग गर्छ ।“ उहाँले थप्नुभयो “ क्वालिटीको काम गर्नुस्, समयमा काम सक्नुस र कसै संग नझुक्नुस् ।“ देश हामीलेनै बनाउनु पर्ने भन्दै उहाँले विदेशीले राम्रा कुरा गर्छन पछि काम हामीले गर्नु पर्छ । नेपालमा देखिएको आर्थिक समस्यालाई सन्तुलन राख्नका लागि व्यवसायी र सरकार एक ठाउँमा बसेर संकट समाधान गर्नुपर्ने उहाँको भनाई थियो । उहाँले भन्नुभयो “तपाईहरु न थाक्नुस । अहिले थाक्ने समय होईन ।“
कार्यक्रममा बोल्दै बागमती प्रदेश आर्थिक मामिला तथा योजना मन्त्री जगन्नाथ थपलियाले व्यवसायीहरु आत्तिनु पर्ने अबस्था नरहेको बताउनुभयो । विश्वमा देखिएको आर्थिक मन्दिको असर नेपालमा पनि देखिएको बताउँदै उहाँले प्रदेश सरकारले चालु पुँजीमा ३० प्रतिशत कटौती गरिएको बताउनुभयो । आयात बढ्नु र निर्यात हुन नसक्नुले समस्या देखिएको उहाँको भनाई छ । उहाँले भन्नुभयो “ निजामती कर्मचमरी, निर्माण व्यवसायीहरु र सबै राजनैतिक दलहरुले सरकारलाई सहयोग गर्नु पर्छ ।“ अहिले बढेको विलासिताको सामान खरिदमा कमी गर्न सके केही हद सम्म समस्या समाधान गर्न सकिने उहाँको भनाई थियो ।
निर्माण व्यवसायी महासंघका अध्यक्ष रवि सिंहले सार्वजनिक खरिद ऐनलाई सबैले स्वीकार गर्नु पर्ने बताउनु भयो । सरकारले हरेक पटक ऐन परिवर्तन गर्दा आफु खुशी भएकाले समस्या बढ्दै गएको उहाँको भनाई छ । कोभिड र रुस एवं युक्रेनको युद्वका कारण नीजि क्षेत्रमा प्रत्यक्ष प्रभाव परेको उहाँले बताउनुभयो । आफुहरु सरकारको सहयोगिका रुपमा काम गर्न तयार रहेको बताउँदै उहाँले राज्यले पनि समग्र निर्माण व्यवसायीको समस्या समाधान गरिनु पर्ने बताउनु भयो ।
साधारण सभामा बोल्ने व्यवसायीहरुले बैंकको व्याजका कारणा निर्माण व्यवसायी धरासायी वन्दै गएको गुनासो गरेका छन् । बैकका कारण साना व्यवसायीहरु ठूलो समस्यामा परेको उनीहरुको भनाई थियो । सार्वजनिक खरिद ऐन संसोधन बिधयक निर्माण ब्यवसायीलाई समस्या पार्ने गरि ल्याउन लागिएको बताउनुभयो । यसलाई निर्माण व्यवसायीहरु बिच छलफलमा ल्याएर मात्रै सदनमा लैजान आग्रह गरेका थिए । कामको प्रगतिको आधारमा मासिक रुपमा भुक्तानीको व्यवस्था हुनु पर्ने उहाँहरुले माग गर्नु भयो । कार्यक्रममा महासंघका सल्लाहाकार यक्षध्वज कार्की, निकोलस पाण्डे , महासंघका बरिष्ठ उपाध्यक्ष एडी लामा, नेपाली काङ्ग्रेस कार्यवहाक सभापति शालिग्राम शर्मा पौडेल, नेकपा एमालेका उपाध्यक्ष कमल पाठक, नेकपा माओवादी केन्द्रका संयोजक रामचन्द्र अधिकारी, राप्रपाका जिल्ला अध्यक्ष रुद्र ढकाल, निर्माण व्यवसायी संघ चितवनका अध्यक्ष केशब प्रसाद लामिछाने लगायतले बोल्नु भएको थियो ।