चितवन – अंग्रेजी नयाँ वर्ष २०२३ को अवसरमा नारायणगढको क्याम्पा चौरमा हुने ‘चितवन म्युजिक फेस्ट’ को तयारी अन्तिम चरणमा पुगेको छ । डिजिफ्लाई ब्राण्डिङ एजेन्सी र एस्ट्रल युथ सोसाइटी भरतपुरको संयुक्त आयोजनामा उक्त कार्यक्रम हुन लागेको हो ।

पौष १६ र १७ गते (डिसेम्बर ३१ र जनवरी १ तारिख) मा हुने कार्यक्रमको तयारी अन्तिम चरणमा पुगेको आज (शुक्रबार) आयोजित पत्रकार सम्मेलनमार्फत जानकारी गराईएको हो । आयोजक डिजिफ्लाई ब्राण्डिङ एजेन्सीका संस्थापक अध्यक्ष निशान्त केडियाका अनुसार कार्यक्रमको लागि स्टेज निर्माणको काम लगभग पुरा भएको छ ।

कार्यक्रम परिसर भित्र १७ वटा स्टलहरु रहनेछन् । ती स्टलहरु निर्माणको काम अन्तिम चरणमा पुगेको उनले बताए । खाना, गेम र फेस पेन्टिङका ती स्टलहरु नि:शुल्क रुपमा उपलब्ध गराइनेछ । तर व्यवसायीहरुले कार्यक्रम प्रायोजकको उत्पादन मात्रै बिक्री गर्नुपर्ने उनले बताए । कार्यक्रमको टिकट बिक्री पनि धमाधम भइरहेको उनले बताए । खल्ती एपबाट पनि टिकट खरिद गर्न सकिने उनले बताए ।

कार्यक्रमका लागि पाँच सय र एक हजार रुपैयाँको टिकटको व्यवस्था गरिएको छ । दुई दिनमा दश हजार दर्शकले कार्यक्रम अवलोकन गर्ने अनुमान गरिएको डिजिफ्लाईका सिईओ प्रसुन श्रेष्ठले बताए । पहिलो दिनका कलाकारहरु चितवन आइसकेको समेत उनले जानकारी दिए ।

पहिलो दिन शनिबार नबिन के भट्टराई, कालीप्रसाद बास्कोटा र दि इलिमेन्ट्सको प्रस्तुति रहनेछ । दोस्रो दिन सविन राई, कबवेब ब्याण्ड र कट्टवले दर्शक झुमाउनेछन् । यस्तै स्थानीय कलाकारहरुको पनि प्रस्तुति रहने उनले बताए । कार्यक्रम सम्पन्न गर्नका लागि ६५ लाख रुपैयाँ खर्च हुने अनुमान गरिएको छ । कार्यक्रमले आन्तरिक पर्यटन प्रवर्द्धनमा टेवा पुग्ने आयोजकको विश्वास छ ।