झोले डाक्टरको भर पर्दा बच्चाको मृत्यु कपिलवस्तुका ग्रामीण भेगमा नक्कली (झोले) डाक्टरको बिगविगी छ । अनुमति तथा प्रमाण विना जो सुकैले क्लिनिक खोलेर बस्छन् । प्रशासनले यस विषयमा कहिल्यै चासो देखाएन भने जिल्ला स्वास्थ्य कार्यालय पनि कहिल्यै गम्भीर बनेन । त्यस्तै झोले डाक्टरको भर पर्दा शनिवार राती एक बच्चाको ज्यान गएको छ ।

शुध्दोधन गाउँपालिका ५ हथिहवा शिवलवाका पन्नालाल राजभरको छोराको कान दुख्यो । नजिकै रहेको सहानी मेडिकल लगेर देखाए । आफूलाई डाक्टर भन्ने विनयकुमार मल्लाहले मोनसेक नामक सुइ पाखुरामा लगाइदिए । त्यसको १० मीनेटमै १४ बर्षिय छोरा दुर्गेश राजभर बेहोश भए । थप उपचार गराउन लबनी अलशेख अस्पताल लगे । त्यहाँ उपचार हुन सक्दैन भनी तौलिहवा जिल्ला अस्पताल ल्याउँदा बाटोमै बच्चाको मृत्यु भयो ।

घटनालगत्तै परिवारको आग्रहमा नक्कली डाक्टर अम्रेश सिंहलाई प्रहरीले पक्राउ गरेको छ । पक्राउ गरिएका सिंहसंग मेडिकल प्रमाणपत्र,मेडिकल काउन्सिल तथा अन्य चिकित्सकसम्बन्धी कुनै कागजात नरहेको प्रहरी निरिक्षक रेशम पौडेलले जानकारी दिए ।

यस सम्बन्धमा थप अनुसन्धान गरी अघि बढ्ने प्रहरीले जनाएको छ । मृतकका बाबु पन्नालालले छोरालाई कान दुखेको भनेर लगेको तर सुइ लगाउनेबित्तिकै छट्पटाएर अचेत बनेको बताएका छन् । नक्कली डाक्टरलाई कर्तव्य ज्यानसम्बन्धी मुद्धा हाल्ने उनले बताए ।कपिलवस्तुमा झोले तथा बंगाली डाक्टरको बिगविगी छ ।

जिल्लाको सीमाना क्षेत्रका स साना बजारहरुमा विना अनुमति,नक्कली कागजात देखाएर पसल थापेर बस्ने गर्दछन् । चाकरचौडा, मर्यादपुर, महाराजगंज, चन्द्रौटा, कृष्णनगर क्षेत्रमा झोले डाक्टरको विगविगी छ । सुरक्षा श्रोतका अनुसार विना आधारप्रमाण जिल्लामा ४७ भन्दा बढि त्यस्ता क्लिनिक संचालनमा रहेपनि नियमन गर्ने तर्फ भने कसैको ध्यान गएको छैन ।