बझाङ बुङ्गल नगरपालिका वडा नं ९ रारुका पुष्कर पार्कीका पत्नी २२ वर्षीया गिता, छोरी ५ वर्षीया भुमिका, छोरा ३ वर्षीय मोहित बुधबार बिहान रुखमा झुण्डिएको अवस्थामा फेला परे। दुर्गम वस्तीको जिउ सिरिङ्ग पार्ने यो हृदयबिदारक घटनाको रहस्य अझै खुली सकेको छैन।

डेढ महिनाअघि मजदुरी गर्न भारतको पिथौरागढ गएका पुष्कर घर आएकै राती घटना घटेको हो। मंगलबार राति १२ बजेतिर मदिरा सेवन गरेको अवस्थामा उनी घर पुगेका थिए। बुधवार बिहान उनको पत्नी, छोरा छोरी घर भन्दा करिव ढेड सय मिटर दुरीमा रहेको रुखमा स्थानीयले झुण्डिएको अवस्थामा देखेका थिए। छोरा र छोरी सलले झुण्डिएको अवस्थामा र महिला डोरीले झुण्डिएको अवस्थामा फेला परेका थिए। घटनास्थलमा टर्च फेला परेको छ। बझाङ जिल्ला प्रहरी कार्यालयका निमित्त प्रमुख प्रहरी निरिक्षक रमेश अवस्थीले मृतकको शरिरमा बाहिरबाट देखिने निलडाम, चोटपटक रहेको बताएका छन्।

बिहीबार पोष्टमार्टमका लागी तीनै जनाको शव सदमुकाम चैनपुर ल्याइएको छ। घटनाको अनुसन्धान भैरहेको र अहिलेसम्म घटनाको बारेमा एकिन भन्न नसकिने उनले बताए। पिथौरागढ बाट राति घर पुगेका पुष्करले बाटोबाटै घर आउन लागेको खाना बनाइराख्न भनेर फोन गरेका थिए। छोराछोरीको लागि चकलेटसम्म नल्याएर रित्तो हात मदिरा सेवन गरेको अवस्थामा उनी घर पुगेको बुझिएको प्रहरी निरिक्षक अवस्थीले बताए। पत्नीले चप्पल ल्याईदिनु भनेकाले रातो चप्पल भने लगेर गएका थिए।

राति ३, ४ बजेतिर घटना घटेको हुन सक्ने उनी बताउँछन्। राति १२ बजे घर पुगेर भान्टाको तरकारीसँग मकैको रोटी खाएर सुतेको र बिहान मात्र रुखमा झुण्डिएको अवस्थामा छन् भनेर जानकारी पाएको पुष्करले प्रहरीलाई बयान दिएका छन्।

बलात्कारको घटनाले मानसिक रुपमा बिक्षिप्त थिइन् गिता

अहिलेसम्म रुखमा तीन जना झुण्डिएको घटनाको एकिन कारण खुल्न सकेको छैन। प्रहरीले अनुसन्धान जारी राखेको छ। गत साउन महिनामा गाउँकै पुरुषबाट बलात्कृत भएकी गिता मानसिक रुपमा निकै पिडामा रहेको आफन्तले बताएका छन्। प्रहरी निरिक्षक अवस्थीले पनि बलत्कारको घटना पछि महिला मानिसिक रुपमा बिक्षिप्त रहेको बुझिएको बताएका छन्।

श्रीमान मजदुरीका लागि पिथौरागढ भएका बेला गत वर्षको साउन २० गते गाउँका झलक दमाईले राति घरमै आएर ती महिलालाई बलत्कार गरेर ज्यान मार्ने गरि कुटपिट समेत गरेको मृतक महिलाका जेठाजु गणेश पार्कीले बताए। अभियुक्त झलक पूर्पक्षका लागि कारागारमा रहेको प्रहरी निरिक्षक अवस्थीले बताए। ‘बलत्कारको घटना पछि काम गर्न मन नगर्ने, टोलाईराख्ने, अरुसँग कुराकानी गर्न मन नगर्ने गरेको थिइन्’जेठाजु गणेशले भने। मलाई अरु मान्छेले गलत नजरले हेर्छन, हेप्छन भनेर मानसिक रुपमा धेरै पिडामा रहेको उनले बताए।

‘गाई भैसि गोठमै वाधिराख्ने, घरमै वसिराख्ने, पुरै व्यवहार बदलिएकोे थियो’उनले भने। बलत्कारको घटना पछि गिताको मात्र नभई भाई पुष्कर पनि घरमै बसिराख्ने काम गर्न जान मन नगर्ने फरक व्यवहार देखिएको उनी बताउछन्। ‘भाई काम नगरेर घरमै बसिरहेको थियो, मैले नै घरमा बसेर के गर्छस् मजदुरी गर्न जाउँ भनेर पठाएको हुँ’उनले भने।

परिवारको आर्थिक अवस्था कमजोर रहेकी गिता बलत्कारको घटनापछि समाजिक रुपमा पनि अपहेलित भएकाले मानसिक पिडामा थिइन्। बुधबार राति रितो हात मदिरा सेवन गरेर आएका पुष्कर र गिताबीच समान्य भनाभन भएको भएको गणेश बताउछन्। बलत्कारको घटनापछि पत्नीको कुनै गल्ती होइन भनेर पुष्करले सहर्ष स्विकारको उनी बताउछन्। घटना पछि पुष्करले त्यो विषयमा पत्नीलाई कहिले केहि नभनेको उनले बताए।

तर बुधबार राति बलत्कारको घटनाको कुरा पुष्करले निकालेको उनको भनाई छ। पहिले पनि त्यस्तो घटना घट्यो, त्यो अहिले पनि फोन उठाउदैनौं, कहाँ जान्छौं, यताउता जाँदा होस गर्दैनौं भनेर मदिरा खाएको बेला सम्झाउनको लागि भनेको भाईलाई उदृत गर्दै गणेशले भने। झगडा नभएको समान्य रुपमा कुरा मात्रै भनेको उनी बताउछन्। मदिरा खाएकोले सुतिहाले अरु केहि थाहा नभएको उनले प्रहरीलाई बयान दिएका छन्।