भरतपुर । गोरखाको मनकामना मन्दिरलाई हिन्दु धर्मावलम्बीहरुका लागि धार्मिक आस्थाको मुख्य केन्द्र मानिन्छ । अन्य धर्म मान्नेहरु भने घुम्नकै लागि पनि मनकामना पुग्ने गर्छन् । धार्मिक आस्थाको ऐतिहासिक धरोहर भएकै कारण धेरैजसो दर्शन गर्नकै लागि मनकामना पुग्छन् ।
तर, हाल मनकामना मन्दिर जान चाहेर पनि जान नसकेकाहरुका लागि भने चितवनमै पनि मनकामना मन्दिर बनेको छ । भरतपुर महानगरपालिकाको वडा नं–१७, लंगौटामा करिब तीन करोड रूपैयाँभन्दा बढी लागतमा मन्दिर निर्माण भइरहेको छ ।
नारायणगढ निवासी राजेश खयरगोली र उनको परिवारले मन्दिर निर्माण गरिदिएका हुन् । करिब चार कट्ठा जमिनमा निर्मित मन्दिरको निर्माण कार्य जारी रहे पनि समुदायलाई हस्तान्तरण भइसकेको छ । तर, स्थानीयको माग र चाहनाअनुसार मनकामनाको आडैमा शिव मन्दिरसमेत निर्माण गरिएको छ ।
‘मनकामनामाईसँगै शिव, गौतमबुद्ध, हनुमानलगायतका भगवान्को दर्शन र पूजा एकै ठाउँमा गर्न पाइयोस् भन्ने उद्देश्यले धेरै थरी मन्दिर एकै ठाउँमा निर्माण गरेका हौँ’, मन्दिर निर्माण समितिका अध्यक्ष एवं संस्थापक खयरगोली भन्छन्, ‘बलि चढ्ने र नचढ्ने देवतालाई छुट्टाछुट्टै ठाउँ बनाएर राखेका छौँ ।’
मनकामना मन्दिरलाई एक ठाउँमा र शिव, हनुमान, बुद्ध, गणेश मन्दिर बूढानीलकण्ठलगायतका मन्दिर अर्को कम्पाउन्डमा निर्मित छ । सोही कम्पाउन्डभित्र मुक्तिनाथको झल्को दिने गरी १०८ धारा राखिएका छन् । बीचमा कुण्ड बनाएर वरिपरि १००८ शालिग्राम राखिएको छ भने १०८ शिवलिङ्गसमेत निर्माण गरिएको छ ।
‘मनकामना गए मनकामनाको मात्रै दर्शन हुने, बूढानीलकण्ठ गए बूढानीलकण्ठको मात्रै दर्शन हुनेलगायतका विषयलाई ध्यान दिएर सबै भगवान्को पूजा एकै ठाउँमा गर्न मिल्ने गरी संरचना निर्माण गरिएको उनले बताए ।
बुबाको चाहनाअनुसार आफ्नै जग्गामा मन्दिर निर्माण गरिएको उनले बताए । मनकामनाबाहेक अन्य मन्दिर र संरचना निर्माणमा भने स्थानीयस्तरबाट समेत सहयोग जुटाएर निर्माण गरिएको उनले बताए ।
‘मनकामना मन्दिरको खर्चमा हामीले नित्तान्त निजी लगानी गरेका छौँ, त्यसैले त्यसको कुनै हिसाब छैन’, उनले भने, ‘बाँकी अन्य संरचनामा भने स्थानीय सरकार, प्रदेश सरकार र जनस्तरबाट संकलित रकम पनि परेको छ ।’
हालसम्म मनकामनाबाहेकका संरचनामा मात्रै करिब डेढ करोड रूपैयाँ खर्च भइसकेको उनले बताए । ‘यसलाई पूरा गर्न अझै पनि एक करोड रूपैयाँभन्दा बढी रकम खर्च हुन्छ होला’, उनले भने, ‘अहिले सबैतिर आर्थिक मन्दी लागेको हुँदा सहयोग जुटाउनै मुस्किल परिरहेको छ ।’
बीचको दुई वर्ष कोभिडका कारण समस्यामा परेको उनले बताए । मन्दिरका लागि आवश्यक सबै निर्माण सामग्री काठमाडौँ, भक्तपुर, पाटनलगायतका क्षेत्रबाट ल्याइएको उनको भनाइ छ । विगत सात वर्षदेखि मन्दिर निर्माण जारी छ ।
निर्माण सम्पन्न नभए पनि पूजाआजाका लागि भने खुला गरिसकेको अध्यक्ष खयरगोलीले जानकारी दिए । भरतपुरको चौबीसकोठीबाट १७ र नारायणगढको पुलचोकबाट जम्मा १३ किलोमिटरको दूरीमा पर्ने उनले बताए ।
मन्दिरमा दर्शन गर्नका लागि चितवनसहित छिमेकी जिल्लाहरुबाट भक्तजन आउने गरेको मन्दिरका पूजारी वीरबहादुर आलेमगरले जानकारी दिए । ‘मन्दिर निर्माण कार्य भइरहेको छ, निर्माण पनि सकिएको छैन । त्यसैले यसको प्रचारप्रसार गर्न पाएका छैनौँ’, उनले भने, ‘निर्माण सकिएपछि प्रचारप्रसार गर्न सके यहाँ पनि भीड लाग्न सक्छ ।’
