पृथक सांगीतिक धारलाई भित्र्याउने श्रेय पाएका लोकप्रिय संगीतकार तथा गायक किरण बाबु पुनद्वारा शब्दरसंगीत गरिएको बहुप्रतीक्षित गीत ”क्षितिज पारी २ नजरबन्दमा” छोटो समयमै श्रोता दर्शकको अपार माया पाउन सफल भएको छ।
लोक संगीत क्षेत्रको लागि फरक धारको गीत ”क्षितिज पारी उनको बस्तीमा” आजभन्दा १० बर्ष अघि बजारमा आएको थियो। उक्त गीत लोक संगीत क्षेत्रकै लोकप्रिय एवं कालजयी गीत भित्र पर्दछ। आजसम्म पनि उक्त गीतको लोकप्रियता कायमै छ। सोही गीतबाट फरकधारलाई भित्र्याउन सफल भई श्रोता दर्शकको अपार माया पाएको त्रिवेणी समूह रामजी खाँण, किरण बाबु पुन र टीका पुनको लगभग एक दशकपछि क्षितिज पारीकै सिक्वेल ”क्षितिज पारी २ नजरबन्दमा” मार्फत एकसाथ कम ब्याक गरेका छन् । बजारमा आएको छोटो समयमै नजरबन्दमाको चर्चा चारैतिर चुलिएको छ।
”नजरबन्दमा” गीतमा किरण बाबु पुनको शब्दरसंगीतको अलावा आवाज रामजी खाँण र टीका पुनको रहेको छ भने एरेन्ज कमल सौराग, रेकर्डिङ्ग सागर पुन र मिक्सिङ्ग कुमार सानु पुनले गरेका छन् । उक्त गीत शंकरा डिजिटल रेकर्डिङ्ग स्टुडियोमा रेकर्ड भएको हो।
किरण बाबु पुनकै कथामा तयार गरिएको भिडियोमा लोकप्रिय गायक रामजी खाँण फरक लुक्समा देखा परेका छन् भने सारिका केसीले खाँणलाई साथ दिएकी छन्। गीतको निर्देशन र सम्पादनमा राजकुमार मगर, छायांकनमा करण चैंसिर, मेकअप अनिमेश गुरुङले गरेका छन् । यो गीत किरण बाबु पुनकै अफिसियल युटुब च्यानल मार्फत सार्बजनिक गरिएको छ। संगीतकार तथा गायक किरण बाबु पुनले पछिल्लो समयमा लोकसंगीतमा देखिएको विकृतिबारे चिन्ता प्रकट गर्दै उक्त विकृतिलाई चिर्नको लागि एउटा प्रयास स्वरुप आफ्नो टीमले रिस्क लिएरै भएपनि गीत बजारमा प्रस्तुत गरेको धारणा आफ्नो अफिसियल फेसबुक पेजमा सार्बजनिक गरेका छन् । हुनपनि पछिल्लो समय यस्ता मर्म बोकेका गीतहरू लोक बजारमा आउन छोडेको घडीमा नजरबन्दमालाई बिशेष रुपमा हेरिएको छ।
भिडियो हेर्नुहोस
