धनगढी । कैलालीको गोदावरी जंगलमा चालकलाई बाँधेर लुटपाट गरी फरार भएका तीनजना भारतीय नागरिकलाई प्रहरीले नियन्त्रणमा लिएको छ । उनीहरूलाई कैलालीको गोदावरी– १ स्थित जंगलबाट नियन्त्रणमा लिइए प्रहरी नायव उपरीक्षक वेदप्रकश जोशीले जानकारी दिए ।
उनकाअनुसार पक्राउ पर्नेमा भारतको हरियाण प्रदेश सोनीपथ बस्ने २१ वर्षीय भगत सिंह, १८ वर्षीय हिल बिदलिसे र २० वर्षीय सन्नी जौट रहेका छन् । उनीहरूले लुटेको कारलाई प्रहरीले गोदावरी– १ स्थित पाठक आयल स्टोरदेखि शान्तिनगर जाने भित्री सडक खण्डमा फेला परेको थियो ।
लिफ्ट मागेर सँगै आएको तीनजनाको समूहले कैलालीको गोदावरीको जंगलबार डडेल्धुराका अतिताल गाँउपालिकाका कर्मचारी कम्प्युटर अपरेटर लोकेन्द्रसिंह भण्डारीको कार लुटेका थिए । लुटेराले भण्डारीलाई चक्कु प्रहार गरी टाउकोमा ढुङ्गाले कुटपिटसमेत गरेका थिए । उनलाई लुटेराले बाँधेर लुटेराहरू फरार भएका थिए ।
उनीहरूले प्रदेश ०१–२३–च ६०२१ नम्बरको कार लुटेका थिए ।
कञ्चनपुरको दैजी घर भएका कम्प्युटर अपरेटर भण्डारी आइतबार महेन्द्रनगरबाट डडेल्धुरा जान हिँडेका थिए । तर, गन्तव्यमा नपुग्दै उनीमाथि लुटपाट र कुटपिट भएको थियो । घाइते भण्डारीको अहिले अत्तरियाको पदमा अस्पतालमा उपचार भइरहेको छ ।
