घटना बिहीबार दिउँसोको हो । काठमाडौं महानगरपालिकाको मेयरमा निर्वाचित हुन लागेका बालेन्द्र शाह पछिल्लो मतगणनाको अवस्थाबारे बुझ्न मतगणनास्थल राष्ट्रिय सभागृह पुगेका थिए ।

त्यहाँ उनले आफ्ना केही शुभेच्छुकहरुसँग सेल्फी खिचे । त्यो देख्नासाथ अघि कतिबेलादेखि भोक र तिर्खा पनि नभनी कुरेर बसेका सञ्चारकर्मीहरुले उनीतिर क्यामेरा सोझ्याए । मेयरमा निर्वाचित भइसकेपछि गर्ने कामहरुका बारेमा प्रतिक्रिया लिन खोजे । उनीतिर माइक अघि बढाए ।
तर, बालेनले ती सञ्चारकर्मीहरुलाई देखेको नदेख्यै गरे । राजशी शैलीमा फटाफट अघि बढे र आफ्नो सेतो रङको कारभित्र पसे । लगत्तै कारको सिसा लगाएर सभागृह परिसरबाट बाहिरिए । सञ्चारकर्मीहरु उनको शैली देखेर हेरेको हे¥यै भए ।

यो त भयो बिहीबारको घटना । केही दिनअघि हिमालय टेलिभिजनका पत्रकारलाई पनि उनले त्यसै गरी उपेक्षा गरेका थिए । ती पत्रकारले पछिल्लो मत परिणामबारे प्रतिक्रिया लिन खोज्दै गर्दा उनी उपेक्षापूर्वक त्यसैगरी हिँडेका थिए ।

केही घन्टामै त्यो भिडियो भाइरल भयो । त्यससँगै बालेनमा मात चढ्न थालेको भन्दै चर्को आलोचना भयो । केही शुभेच्छुकहरुले चाहिँ तनावका कारण प्रतिक्रिया दिन नचाहेको हुनसक्छ भन्ने धारणा राखेका थिए ।

विजय सुनिश्चित भएसँगै बालेनमा एकएक यस्तो बदलाब किन आयो त ? के उनमा विजयको उन्माद चढेको हो ? के उनी राजनीतिक दलका राजनीतिक नेताहरु झैं बेमतलवी हुन थालेका हुन् ? उनको यसखाले गैरजिम्मेवारपूर्ण व्यवहारले उनका बारे अनेक खाले प्रश्न उत्पन्न भएका छन् ।

जब कि मतदान हुनुअघिसम्म उनी यस्ता थिएनन् । उनी अन्तर्वार्ताका लागि बोलावट हुने हरेक सञ्चारगृहमा पुग्थे । ठूलाखाले वा सानाखाले मिडिया भनेर भेदभाव गर्दैनथे । सबै सञ्चारमाध्यमहरु प्रति समभावको व्यवहार गर्थे । पत्रकारहरुले कडाभन्दा कडा प्रश्न सोध्दाखेरि पनि विनम्र शैलीमा प्रस्तुत हुन्थे ।

एकजना विश्लेषकको भनाइमा बालेनालाई मिडियाले उचालेरै यो अवस्थामा पु¥याएको हो । त्यो गुन सम्झेर पनि अहिले उनले आफ्नो चरित्र नबदल्नु पर्ने हो । तर पछिल्ला व्यवहार हेर्दा उनमा मात चढेको देखिन्छ ।

खासमा चुनावी प्रचारका दौरान मिडियाकर्मीहरुले उनका एजेण्डालाई हेरेर साथ दिएका थिए । त्यो साथले उनलाई बढीभन्दा बढी मतदाताको नजरमा पुग्न मद्दत पुग्यो । देश विदेशमा रहेकाहरुले उनका एजेण्डाहरुका बारेमा जान्न पाए । अन्ततः मिडियाले दिएको त्यो साथ र सहयोग नै मतमा रुपान्तरित हुन पुग्यो ।

मिडियालाई बढीभन्दा बढी उपयोग गर्ने र साथ लिने बालेनको नीतिकै कारण सुशील थापा, सुमन सायमी, प्रेमसागर कर्माचार्यजस्ता योग्य कतिपय उम्मेदवारहरु ओझेल परे । बालेनको लोकप्रियता एकाएक चुलियो । उनका सामु अरु सबै फिक्का सावित भए ।

आखिर उनी किन फेरिए ? एक पुराना पत्रकार भन्छन्, “ उनले अहिले प्रतिकृया नदिउँ । बिजय घोषणा भएपछि बोलुँला नि” भनेर पनि त ती मिडियाकर्मीलाई चित्त बुझाउन पनि सक्थे ! “यो मेरो जीतमा तपाईंहरुको साथ र सहयोगको पनि महत्वपूर्ण भूमिका छ, त्यसका लागि हृदयदेखि आभार प्रकट गर्छु” भनेर उल्टै प्रशंसा पनि त गर्न सक्थे !

तर, यी सब कुरा नगरी पूरै उपेक्षा गरेर हिँडेको देख्दा उनमा राजशी उन्माद चढेको प्रष्ट बुझ्न सकिन्छ । उनको व्यवहारले उनी पनि अरु नेताहरुभन्दा भिन्न अर्थात् नेपाली जनताले खोजेको सर्वप्रिय पात्र बन्न सक्दैनन् कि भन्ने आशंका उत्पन्न भएको छ ।

यद्यपि उनले थाहा नपाएको कुरा के हो भने चुनावका बेला मिडियाहरुले उनलाई जसरी खुलेर साथ र सहयोग दिएका थिए, कुनै पनि दिन त्यो साथ र सहयोग बिरोधमा बदलिन बेर लाग्दैन । त्यो बेला उनी टेक्ने न समाउने अवस्थामा पुग्ने छन् ।

आजको प्रेस