काठमाडौं : भरतपुर महानगरपालिकाको मेयरमा माओवादी केन्द्रका अध्यक्ष पुष्पकमल दाहाल ‘प्रचण्ड’की छोरी रेणु दाहाललाई दिने तयारी नेपाली कांग्रेसले गरेपछि भरतपुर कांग्रेसभित्र बिद्रोह भएको छ ।
शनिबार भरतपुर महानगरपालिका–१७ बेलुवा टोलका ५० जना कांग्रेसका नेता कार्यकर्ताले ‘स्वतन्त्र अभियान’भन्दै सामूहिक राजीनामा दिएका छन् ।
भरतपुर महानगरमा कांग्रेसले आफै उम्मेदवार दिनुपर्ने माग कार्यकर्ताको छ । रेणुलाई मेयरमा उम्मेदवार बनाउँदा उनी पराजित हुने र त्यसको फाइदा एमालेले लिने चितवन कांग्रेसको भनाइ छ ।
कांग्रेसका स्थानीय नेता प्रकाश कँडेलसहितका नेता कार्यकर्ताले माओवादीलाई मेयर दिन लागेको भनेर कांग्रेस नेतृत्वलाई दवाव दिन सामूहिक राजीनामा दिएका हुन् ।
कांग्रेसका क्रियाशील र साधारण सदस्यको भेलाले साधारण सदस्य समेत नरहने गरी स्वतन्त्र नागरिकको हैसियतमा रहने निर्णय गरेको कँडेलले बताएका छन् ।
पूर्व वडाध्यक्ष देवनारायण महतो, वडाका पूर्व सभापति विष्णुप्रसाद सुवेदीसहित ५० जनाले सामूहिक राजीनामा दिएका छन् ।
भरतपुरमा भएको यो विद्रोहले देशभरि आगो सल्काउन सक्ने चर्चा हुन थालेको छ ।
कांग्रेसको उम्मेदवारलाई मात्रै भोट दिने बताएका उनीहरूले प्रचण्डकी छोरी रेणुलाई कांग्रेसले सहयोग गरेमा भोट नदिने जनाएका छन् । यो निर्णयले रेणुलाई तनाब भएको छ ।
