काठमाडौ : पत्रकार ऋषि धमलाले प्रधानमन्त्री चढेको नेपाल एयरलाइन्सको विमानभित्र उद्दण्डता गरेको विषयमा नेपाल प्रेस काउन्सिलले बयान लिएको छ ।
कार्यालयमा नै उपस्थित गराएर मौखिक बयान लिइएको हो ।
लिखित रुपमा दिएको स्पष्टिकरण चित्त नबुझेको भन्दै आज दिउँसो काउन्सिलले कार्यालय झिकाएको थियो ।
काउन्सिलको आचारसंहिता अनुगमन समितिले करिब एक घण्टा उहाँको बयान लिएको थियो ।
स्रोतका अनुसार धमलाले विमानभित्र भएको घटनालाई लिएर दुख व्यक्त गर्नुभयो ।
प्रधानमन्त्रीको भ्रमणका विषयमा जनतालाई छिटो सुसूचित गर्नका लागि आफूले विमानभित्र लाइभ गरेको भन्दै उहाँले यदि आफ्नो क्रियाकलापबाट विमानका कर्मचारीहरूलाई अप्ठेरो परेको भए क्षमा याचना गर्ने प्रतिवद्धता जाहेर गर्नुभयो ।
धमलाले पत्रकार आचारसंहिता आफूले राम्ररी नबुझेको स्वीकार गर्नुभयो । अबदेखि म पत्रकार आचारसंहिता अक्षरस पढ्छु, सबै पत्रकारलाई पढ्न प्रोत्साहन गर्नेछु भनेर प्रतिवद्धता गरेपछि बयान टुंगिएको थियो ।
उहाँले अब राम्ररी पढेर यसलाई मनन गर्छु र अरू पत्रकारहरूलाई पनि आचार संहिता अध्ययन गराउन क्याम्पेन नै चलाउँछु भन्नुभयो काउन्सिल स्रोतले बतायो ।’
नियामक निकायका रूपमा काउन्सिलले आफूमाथि गरेको निगरानीलाई सकारात्मक रूपमा लिएको धमलाको भनाई छ । यसले पत्रकारिता जगतलाई शुद्धीकरण गर्न मद्दत मिल्ने उहाँले विश्वास व्यक्त गर्नुभयो ।
काउन्सिलका अध्यक्ष बालकृष्ण बस्नेतसहित आचारसंहिता अनुगमन समितिका पदाधिकारीहरूले धमलासँग बयान लिएको बुझिएको छ । बयान दिन धमला १२ बजेतिर एक्लै काउन्सिल पुग्नुभएको थियो ।
प्रधानमन्त्री शेरबहादुर देउवा भारत भ्रमणबाट फर्कने क्रममा त्रिभुवन विमानस्थलमा अवतरण भएको विमानभित्र धमलाले टेलिभिजन लाइभ गर्ने नाममा कर्मचारीमाथि हुल हुज्जत गरेको आरोप लागेको थियो । काउन्सिलले थप अध्ययन र छलफल पश्चात् धमलाका बारे निर्णय लिने जनाएको छ ।
