काठमाडौं : आइतवार दिउसो सीआइबीको कार्यालय पुगेकी नायीका प्रियंका कार्कीले उल्टै उजुरी दिएर फर्किएकी छन् । क्रिप्टोकरेन्सीको प्रमोट गरेको अभियोगमा सिआइबीको निगरानीमा परेकी प्रियंकाले उल्टै आफू माथि अन्याय भएको भन्दै उजुरी दिएकी हुन् । उनले क्रिप्टोकरेन्सीको विज्ञापनमा आफ्नो तस्वीर दुरुपयोग गरिएको आरोप लगाउँदै छानविनको माग सहित उजुरी दिएकी हुन् ।

अभिनेत्री प्रियंका कार्की आइतवार प्रहरीको केन्द्रीय अनुसन्धान ब्युरो (सीआईबी) पुगेकी थिइन् । केही फेसबुक पेजबाट सेयर गरिएको क्रिप्टोकरेन्सीको क्षेत्रीय विज्ञापनमा आफ्नो भिडियो र तस्बिर राखिएको प्रियंकाको भनाई छ । उनले फोटो दुरुपयोग गर्ने दोषीलाई पक्राउ गरी कानुन बमोजिम कारबाही गर्न माग गर्दै उजुरी दिएको बताएकी छन् ।

मेरो फोटो मिसयुज गरेर क्रिप्टोकरेन्सीको विज्ञापन बनाइएको रहेछ । दोषी पत्ता लगाएर कारबाहीको माग गर्दै उजुरी दिएकी छु,’ प्रियंकाले सिआइबीवाट फर्किएपछि भनिन् । उनले आफुलाई सिआइबीले बोलाएको नभएर आफै छानविनमा सघाउन कार्यालय पुगेको बताएकी छन् ।

उनले आफ्नो फोटो दुरुपयोग गर्ने व्यक्ति र फेसबुक पेजबारे प्रहरीले अनुसन्धान सुरु गरिसकेको उनले बताइन् । नेपाल राष्ट्र बैंकले नेपालमा क्रिप्टोकरेन्सी कारोबारलाई अवैध घोषणा गरिसकेको छ । केही यो घटनामा पक्राउ समेत परेका छन् ।