बर्दिया : बर्दियाको बाँसगढीमा बस दुर्घटना हुँदा ३५ जना घाइते भएका छन् ।

बाँसगढी नगरपालिका ३ मा बिहान करिब सवा ३ बजेको समयमा बस दुर्घटना हुँदा ३५ जना यात्रु घाइते भएका प्रहरीले जनाएको छ । उनीहरु मध्ये दुई जनाको अवस्था गम्भीर छ ।

कालीकोटको त्रिवेणी गाउँपालिका ६ की ११ वर्षिय शीतला उपाध्याय र सान्नी त्रिवेणी गाउँपालिका ७ की ६९ वर्षीया ओमना उपाध्यायको अवस्था गम्भीर रहेको इलाका प्रहरी कार्यालय मोतीपुरले जनाएको हो ।

जिल्ला प्रहरी कार्यालय बर्दियाका अनुसार कालीकोटबाट महेन्द्रनगर तर्फ जाँदै गरेको ना ५ ख ५३८२ नम्बरको बस अनियन्त्रित भएर दुर्घटना भएको हो । बस सडकदेखि अन्दाजी १५ मिटर तल खसेको सूचना अधिकारी हेम बहादुर शाहीले बताए ।

दुवै जनालाई उपचारका लागि बाँकेको कोहलपुर स्थित नेपालगञ्ज मेडिकल कलेज पठाईएको प्रहरीले जनाएको छ । सामान्य घाइते भएका अन्यको कौशिल्या अस्पतालमा उपचार भइरहेको छ ।

बस चालक कैलालीको धनगढी उपमहानगरपालिका १७ किसन शिंह खत्रीलाई प्रहरीले नियन्त्रणमा लिएर थप आवश्यक अनुसन्धान गरिरहेको छ ।