चितवन : चितवनमा विद्युत् सट हुँदा घर र गोठमा क्षति हुन पुगेको छ । पूर्वी चितवनको रत्ननगर नगरपालिका–१६ शिवालय टोलका घर धनी डिल्ली भुजेलको घर र गोठमा क्षति पुगेको हो ।

११ हजार भोल्टको विद्युत् सट हुँदा भुजेलको गोठमा रहेको एउटा गाईको बाच्छी र बाख्रो मरेको प्रहरी कार्यालय टाँडीले जनाएको छ । दुईवटा बाख्रा र एउटा बच्छी घाइते भएको कार्यालयले जनाएको छ ।

कार्यालयकाका अनुसार घर धनी भुजेल सामान्य घाइते हुनुभएको र उहाँलाई उपचारका लागि अस्पताल पठाइएको छ । थप विवरण आउन बाँकी रहेको छ ।

नेपाल विद्युत् प्राधिकरण वितरण केन्द्र टाँडीका प्रमुख नवीन लाभका अनुसार विद्युत् तारलाई पोलबीचमा छुट्याउने पिन इन्सुलेटरबाट तार चुँडियर भुइँमा झर्दा विद्युत् सट भएको हो । ओसिलो भुइँमा विद्युतीय तारले छुँदा गोठमा करेन्ट लागेको उहाँले जानकारी दिनुभयो । उक्त घरगोठ नजिकैबाट हाइटेन्सन लाइन लगिएको छ ।

घटनापछि अहिले मर्मतको काम सुरु भएको लाभले बताउनुभयो ।