नवलपुर । गत असोज ४ गते आइतबार गैँडाकोट इंग्लिस स्कूलमा विद्यार्थी कुटपिटको घटनालाई लिएर सञ्चारमाध्यमले गलत हल्ला फैलाएको भन्दै विद्यालयले भ्रम छरेको छ । सरकारले बिदा दिएको दिन विद्यालय सञ्चालनको नाममा विद्यार्थीलाई बोलाएर कुटपिट गरेको घटनामा अभिभावकसँग “सहमति” गरेर मिलाएपछि सञ्चारमाध्यमलाई बदनाम गराउने खेल सुरु गरिएको छ ।

विद्यालयले पीडित विद्यार्थीको अभिभावकसँग “गोप्य सहमती” गर्दै सञ्चारमाध्यमलाई जबरजस्ती दोषी करार गर्नेगरी विज्ञप्ती जारी गरेको छ ।

घटनामा घाइते भएका विद्यार्थीका अभिभावकले सञ्चारमाध्यमसँग कुराकानी गर्दै घटनाबारे जानकारी गराउँदै विद्यार्थीको कानमा पुगेको क्षति बारे जानकारी गराएका थिए । त्यससँगै घाइते बालकको कानको परीक्षणको रिपोर्टसमेत उपलब्ध गराएका थिए ।

यद्यपि पछि विद्यालयसँग गोप्य सहमति गर्दै मिडियालाई आफूले कुनै पनि सूचना नदिएको भन्दै मिडियाले आफूखुसी समाचार बनाएको भन्दै विज्ञप्ती नै जारी गरिन् । पीडित विद्यार्थीकी सानिमा नन्दिता थापा मगरले पठाएको सन्देश र पछि सहमति गरेपछिको विज्ञप्ती हामीले यहाँ उपलब्ध गराएका छौँ ।

थापाले मिडियालाई एउटा जानकारी दिएर विद्यालयसँग सहमति गरेपछि आफूले दिएको होइन भन्दै विज्ञप्ती निकाल्नुले उनी विद्यालयको प्रभावमा परेको बुझ्न सकिन्छ । घाइते विद्यार्थीको स्वास्थ्य परीक्षणसमेत थापाले नै मिडियालाई उपलब्ध गराएकी थिइन् । विद्यालयसँग सहमतिपछि उनले मिडियालाई दिएको जानकारी मेटाएपनि त्यसको डिजिटल फुटप्रिन्ट मेटिँदैन भन्ने कुरा सहमति गराउने र गर्ने पक्षले जान्नुपर्ने हो ।

शिक्षकको कुटाइबाट विद्यार्थी घाइते भएको घटना सञ्चारमाध्यममा आएपछि विद्यालयले घटनालाई अतिरञ्जित गरिएको भन्दै विज्ञप्ती निकाल्यो । अतिरञ्जित गरिएको भए पीडिक भनिएका ती शिक्षकलाई विद्यालयले किन निस्कासन गर्यो ?

गैँडाकोट इंग्लिस स्कुल (जिइएस)को गलत कुरामा प्याब्सन नवलपुरले समेत साथ दिएको छ । प्याब्सन नवलपुरले विद्यालयको प्रभावमा परेर सत्यकुरा नबुझी विज्ञप्ती निकालेको छ । प्याब्सनले निकालेको विज्ञप्तीमा समेत मिडियालाई दोषि देखाइएको छ ।

घटनामा घाइते भएका कक्षा ८ का छात्रकी सानिमा नन्दिता थापाले दिएको सूचना, स्वास्थ्य परीक्षण रिपोर्ट, थापाले निकालेको झुटो विज्ञप्ती तथा विद्यालयल र प्याब्सनले निकालेको सूचना समेत यहाँ राखेका छौँ ।