नवलपुर । नवलपुरको गैँडाकोटमा सञ्चालन भएको चौथो गैंडाकोट महोत्सव २०८२ को हिसाब सार्वजनिक गरिएको छ । गत वर्षको पुस २५ देखि माघ १० गतेसम्म नारायणी नदी किनारमा भएको महोत्सवको हिसाब मंगलबार सार्वजनिक गरिएको हो ।

मंगलबार गैँडाकोटमा आयव्यय विवरण प्रस्तुत एवम् पत्रकार भेटघाट कार्यक्रम गर्दै आयोजक जिल्ला उद्योग वाणिज्य संघ गैँडाकोटले सार्वजनिक गरेको हिसाबअनुसार महोत्सवले उठेको रकमध्ये ३४ हजार रुपैयाँ फाइदा गरेको छ । मंगलबार सार्वजनिक विवरण अनुसार महोत्सव अवधिभर कुल ६५ लाख ७६ हजार ६२६ रुपैयाँ बराबरको आर्थिक कारोबार भएको छ । आम्दानीका मुख्य स्रोतहरूमा स्टल बिक्री, टिकट बिक्री, बाल उद्यान, विभिन्न प्रायोजकहरू र नेपाल सरकारबाट प्राप्त सहयोग रहेका महोत्सव मूल समिति संयोजक एवम् संघका वरिष्ठ उपाध्यक्ष छवि कँडेलले जानकारी दिए ।

महोत्सवको कुल आम्दानीमध्ये २४ लाख ६१ हजार ८६५ रुपैयाँ नगद संकलन भएको तथा बोलकबोल भएकोमध्ये ४१ लाख १४ हजार ७६१ रुपैयाँ उठ्न बाँकी रकम रहेको कँडेलको भनाइ छ । यस्तै, महोत्सव सञ्चालनका लागि कुल २४ लाख १६ हजार २१ रुपैयाँ खर्च भएको कँडेलले बताए । उनका अनुसार कर्मचारी तलब, इन्धन, प्रचारप्रसार, मञ्च व्यवस्थापन, सुरक्षालगायतका २४ वटा शीर्षकमा महोत्सवको रकम खर्च भएको छ ।

महोत्सवको नगद आम्दानी र कुल खर्चको हिसाब गर्दा कर कट्टा गर्नुअघि ४५ हजार ८४४ रुपैयाँ नाफा गरेको भन्दै नाफाबाट नियमानुसार २५ प्रतिशत कर कट्टा गरेपछि महोत्सवको खुद नगद बचत ३४ हजार ३८३ रुपैयाँ भएको उनले बताए । हिसाब सार्वजनिक गर्दै कँडेलले महोत्सवले आर्थिक मन्दीका बीच पनि स्थानीय व्यापार र पर्यटन प्रवर्द्धनमा महत्वपूर्ण टेवा पु¥याएको बताए । चौथो गैँडाकोट महोत्सवको नगद बचत थोरै देखिए पनि यसले समग्र गैंडाकोटको आर्थिक क्षेत्रलाई चलायमानतामा ठूलो ऊर्जा थपेको उनको भनाइ छ ।

हिसाब सार्वजनिक कार्यक्रममा संघका अध्यक्ष एवम् महोत्सवका संरक्षक दीपक सापकोटाले उठ्न बाँकी रहेको सबै रकम उठ्ने दाबी गरे । “बाँकी भएको सबै रकम उठ्छ, यसमा शङ्का गर्नुपर्ने ठाउँ नै छैन” उनले भने, “महोत्सवपछि भएको आम निर्वाचन, उद्योग वाणिज्य महासंघको निर्वाचनलगायतका कारणले रकम उठ्न ढिला भएको हो ।” विगतका कमीकमजोरीहरुलाई हटाउँदै पाँचौं महोत्सव गर्ने तयारीमा उद्योग वाणिज्य संघ जुटेको उनले बताए ।

महोत्सवलाई प्रवर्द्धनमुखी बनाउन खोज्दा धेरै नाफा नभएको सापकोटाको भनाइ छ । “हामीले स्थानीय उत्पादनका लागि निःशुल्क स्टल उपलब्ध गराएका थियौँ” सापकोटाले भने, “कृषि, डेरी तथा अन्य स्थानीय उत्पादनका गरी महोत्सवमा ३९ वटा स्टल निःशुल्क प्रदान गरिएको थियो ।” महोत्सवमा जम्मा १२३ वटा स्टल राखिएको भन्दै सापकोटाले महोत्सवबाट स्थानीय व्यवसायीहरु सन्तुष्टि भएको बताए ।