चितवन । रोयल इन्फिल्डले चितवनको भरतपुरसहित देशभरी आफ्नो लोकप्रिय क्लासिक ३५० मोटरसाइकलको नयाँ भेरियन्ट ‘गोवन क्लासिक ३५०’ सार्वजनिक गरेको छ । चितवनको भरतपुरमा यसको आधिकारिक वितरण सन अटोमोबाइल्स प्रालि ले गरेको हो ।

बुधबार भरतपुरमा आयोजित भव्य समारोहका बीच सन अटोमोबाइल्सका सञ्चालक गोविन्द श्रेष्ठ, चितवन उद्योग वाणिज्य संघका उपाध्यक्ष राजन पिया, चितवन अटोमोबाइल एशोसिएनका अध्यष मोहन केसी, पूर्व अध्यक्ष सूर्य अधिकारी, अमृत जोशीलगायतले गोवन क्लासिक सार्वजनिक गर्नुभएको हो । नयाँ गोवन क्लासिक ३५० पुरानो शैलीलाई आधुनिक प्रविधिसँग संयोजन गरिएको बोबर शैलीको क्रुजर मोटरसाइकल भएको सन अटोमोबाइल्सका सञ्चालक गोविन्द श्रेष्ठले बताउनुभयो ।

यसमा सीधा ह्यान्डल, अगाडि सरेका खुट्टा राख्ने भाग र आरामदायी आसन जस्ता विशेषता रहेका भन्दै उहाँले जसका कारण लामो दूरीमा पनि सहज र आरामदायी यात्रा गर्ने सुविधा दिने बताउनुभयो । क्लासिक ३५० मा प्रयोग भएको परिष्कृत इन्जिन राखिएकाले सहज प्रदर्शन र विश्वसनीयता सुनिश्चित गरेको उहाँको भनाइ छ । गोवन क्लासिकमा पुरानो शैलीको आकर्षण भए पनि यसमा दैनिक प्रयोगलाई सहज बनाउने आधुनिक सुविधा समावेश गरिएको श्रेष्ठको भनाइ छ ।

भरतपुरमा गोवन क्लिासिक ३५० दुई भेरियन्टमा उपलब्ध रहेको भन्दै श्रेष्ठले आधारभूत भेरियन्टको मूल्य पाँच लाख ९८ हजार र उच्च भेरियन्टको मूल्य ६ लाख दुई हजार रुपैयाँ रहेको श्रेष्ठले बताउनुभयो । गोवन क्लासिकले नेपालमा क्रुजर मोटरसाइकल बजारलाई नयाँ आयाम दिने अपेक्षा गरिएको उहाँको भनाइ छ । यसको बोबर शैलीको डिजाइन, आरामदायी आसन र मौलिक आकर्षणले नेपाली मोटरसाइकल प्रेमीहरूलाई आकर्षित गर्ने विश्वास गरिएको उहाँले बताउनुभयो ।

चितवन उद्योग वाणिज्य संघका उपाध्यक्ष राजन पियाले चितवनमा मोटरसाइकलको वार्षिक बजार १० हजारको रहेको बताउनुभयो । जसमा आठ प्रतिशत स्कुटरको रहेको उहाँको भनाइ छ । बुलेट बाइकको ब्राण्ड राम्रो रहेको भन्दै पियाले गोवन क्लासिक ३५० नेपालमा रोयल इन्फिल्ड प्रेमीहरूका लागि शैली, आराम र मौलिक क्रुजर अनुभवको नयाँ विकल्प बन्नसक्नेमा आफू विश्वस्त रहेको बताउनुभयो ।

केही दिन अगाडि रोयल इन्फिल्ड राइडरहरु सयौँको सङ्ख्यामा रारा पुगेर फर्किएका थिए । उनीहरुले एक हजार २०० किलोमिटर दूरीको यात्रा सफलतापूर्वक पूरा गरेका बताइएको छ ।