गैँडाकोट, चैत ७, २०८२ नवलपुरको गैँडाकोटस्थित अग्रणी शैक्षिक संस्था गैँडाकोट नमूना माध्यमिक विद्यालय/कलेज (GNSSC) ले आगामी शैक्षिक सत्रका लागि आफ्नो विस्तृत ‘वार्षिक व्यावसायिक योजना’ (Annual Business Plan – ABP) सार्वजनिक गरेको छ। शनिबार बिहान ८ बजेदेखि साँझ ७ बजेसम्म चलेको एक म्याराथन बैठकले विद्यालयको आगामी मार्गचित्र तय गरेको हो।

पूर्वाधार र प्रविधिमा फड्को बैठकले मुख्य गरी विद्यालयको भौतिक पूर्वाधार र अत्याधुनिक शिक्षण पद्धतिलाई प्राथमिकतामा राखेको छ। निर्माणाधीन नयाँ सुविधासम्पन्न भवनमा आगामी शैक्षिक सत्रदेखि कक्षा सञ्चालन गर्ने र सबै कक्षाकोठाहरूलाई ‘स्मार्ट क्लासरुम’ का रूपमा रूपान्तरण गर्ने निर्णय गरिएको छ। प्रविधिमैत्री शिक्षाका लागि मल्टिमिडिया र डिजिटल सिकाई सामग्रीको प्रयोगलाई अनिवार्य बनाइने योजनामा उल्लेख छ।

नेतृत्व र योजनाकारको भूमिका कार्यक्रमको मुख्य योजनाकारका रूपमा म्यानेजिङ डिरेक्टर (Managing Director) इन्द्र प्रसाद रेग्मी रहनुभएको थियो। उहाँले विद्यालयको व्यावसायिक र संरचनात्मक विकासको खाका प्रस्तुत गर्नुभएको थियो। कार्यक्रमको अध्यक्षता विद्यालय व्यवस्थापन समितिका अध्यक्ष दीपक कुमार लम्सालले गर्नुभएको थियो। प्रिन्सिपल गोपेन्द्र केशरी न्यौपानेले विद्यालयको शैक्षिक लक्ष्य र भावी चुनौतीका बारेमा स्पष्ट पार्नुभएको थियो। कार्यक्रमको सहजीकरण तथा सञ्चालन भाइस प्रिन्सिपल चन्द्र के.सी. ले गर्नुभएको थियो।

साझा दृष्टिकोण र भिजन बैठकमा विद्यालयका शेयरधनीहरू तथा विभिन्न तहका संयोजक (Level Coordinators) हरूले आ–आफ्नो विभागको भावी योजना र ‘भिजन’ प्रस्तुत गर्नुभएको थियो। सहभागीहरूले विद्यालयलाई केवल किताबी ज्ञानमा मात्र सीमित नराखी अनुसन्धान र प्रविधिमा आधारित नमूना शिक्षण केन्द्र बनाउने प्रतिबद्धता जनाएका छन्।

दिनभरिको उपलब्धिमूलक मन्थन बिहानैदेखि सुरु भएको यो छलफल निकै उपलब्धिमूलक रहेको प्रशासनले जनाएको छ। बैठकले ‘७-ए फ्रेमवर्क’ लाई प्रभावकारी रूपमा लागू गर्ने निर्णय गर्नुका साथै शिक्षकहरूको कार्यभार ऐन (Workload Act) र संस्थागत निर्देशिका २०८३ लाई समेत अनुमोदन गरेको छ।

अध्यक्ष दीपक कुमार लम्सालले भन्नुभयो, “हामी गफमा भन्दा परिणाममा विश्वास गर्छौँ। नयाँ भवन र स्मार्ट क्लासरुमको सुरुवातसँगै गैँडाकोट नमूनाले शिक्षा क्षेत्रमा नयाँ मानक स्थापित गर्नेछ।”