चितवन, २४ मङ्सिर । मिड साइज मोटरसाइकल समूह (२५०–७५० सीसी) मा विश्वकै अग्रणी ब्रान्ड रोयल इन्फिल्डले आफ्नो लोकप्रिय स्ट्रिट रोड्स्टर मोडेल हन्टर ३५० को नयाँ २०२५ संस्करण भरतपुरमा सार्वजनिक गरिएको छ ।
सन अटोमोबाइल्सका सञ्चालक गोविन्दमान श्रेष्ठका अनुसार विश्वका प्रख्यात सहरहरूको ‘कुल’ जीवनशैलीबाट प्रेरित रङ, सुधारिएको सस्पेन्सन र सहज एर्गोनोमिक डिजाइनसहितको बीएस–६ नयाँ हन्टर ३५० प्रस्तुत गरिएको हो । नयाँ हन्टर ३५० मा रियो ह्वाइट, टोकियो ब्ल्याक, लण्डन रेड र ग्राफिट ग्रे गरी चार ‘स्ट्रीट–इन्स्पायर्ड’ रङ उपलब्ध छन्, जसमा रियो ह्वाइट रियोका सेता तटबाट, लण्डन रेड लण्डनका ब्रिक लेनबाट र टोकियो ब्ल्याक टोकियोका रातो–कालो शहरी सडकबाट प्रेरित रहेको बताइएको छ भने ग्राफिट ग्रेले मोटरसाइकललाई ‘स्टेल्थ’ लुक र दमदार उपस्थिति दिने श्रेष्ठले बताउनुभयो ।
यस संस्करणमा स्लिप–एसिस्ट क्लच जडान गरिएको छ, जुन रोयल इन्फिल्डको ३५० सिसी सिरिजमा पहिलो पटक प्रयोग भएको सुविधा हो । परिमार्जित पछाडिको सस्पेन्सन बढेर १६० एमएम ग्राउण्ड क्लियरेन्स, सुधारिएको सिट, डुअल च्यानल एबीएस, एलईडी हेडलाइट, एर्गोनोमिक डिजाइन तथा ट्रिप नेभिगेटर एप सपोर्ट समावेश गरिएको कारण समग्र सवारी अनुभवलाई अझ सहज, सुरक्षित र आधुनिक बनाउने श्रेष्ठले जानकारी दिनुभयो ।
हन्टर ३५० मा प्रयोग गरिएको ३४९ सिसी जे–सिरिज इन्जिनले शहरी सडकको दैनिकीमा चुस्ती र सहजता प्रदान गर्ने उहाँको दाबी छ । सन् २०२२ मा पहिलो पटक बजारमा आएको यो मोडेलले हालसम्म विश्वभर ७ लाखभन्दा बढी राइडरको विश्वास जितिसकेको पनि उहाँले बताउनुभयो । नेपाली बजारमा नयाँ हन्टर ३५० को मूल्य सिङ्गल टोन (रियो ह्वाइट, डापर ग्रे र ग्राफिट ग्रे) का लागि रु ४,९४,९०० र डुअल टोन (टोकियो ब्ल्याक, लण्डन रेड र रिबेल ब्लु) का लागि रु ४,९९,९०० तोकिएको श्रेष्ठले बताउनुभयो ।
कार्यक्रममा चितवन अटोमोबाइल एशोसिएसनका अध्यक्ष मोहन केसीले रोयल इन्फिल्ड मोटरसाइकल ग्राहकको पहिलो रोजाइ बन्दै आएको उल्लेख गर्दै नयाँ हन्टर ३५० ले अझै धेरै उपभोक्ताको मन जित्ने विश्वास व्यक्त गर्नुभयो भने युवादेखि प्रौढसम्म सबैले चढ्न मिल्ने मोडेल भएकाले यसको बजार अझ फराकिलो हुने धारणा राख्नुभयो ।
त्यसैगरी, चितवन रिकण्डिसन एशोसिएसनका संस्थापक अध्यक्ष सूर्य अधिकारीले सबै वर्ग, उमेर र पेसाका व्यक्तिलाई समेट्दै बुलेटको नयाँ मोडेल बजारमा आएको उल्लेख गर्दै चितवनको बजारमा यसले राम्रो व्यापार गर्ने विश्वास व्यक्त गर्नुभयो ।
