भारत- भारतको गुजरात राज्यमा ४० वर्ष पुरानो पक्की पुल भत्किँदा भएको भीषण दुर्घटनामा कम्तीमा ९ जनाको मृत्यु भएको छ भने ६ जना घाइते भएका छन्।वडोदरा जिल्लाको बाहिरी भागमा पर्ने माही नदीमाथि बनेको पुल अचानक भत्किँदा दुईवटा ट्रक, एउटा पिकअप भ्यान, एउटा कार र एउटा अटोरिक्सा नदीमा खसेका हुन्। दुर्घटना आणंद र वडोदरा जिल्लालाई जोड्ने पुलमा भएको हो।

वडोदरा जिल्ला अधिकारी अनिल धामेलियाका अनुसार, घटनापछि जिल्ला प्रशासन र स्थानीय प्रहरी तुरुन्तै घटनास्थलमा पुगेर उद्धार कार्य सुरु गरेका छन्। घाइतेहरूको स्थानीय अस्पतालमा उपचार भइरहेको छ।

समाचार एजेन्सी पीटीआईका अनुसार, दुर्घटना भएको पुल झन्डै चार दशक पुरानो थियो। पुल भत्कनुका कारणहरूबारे छानबिन गर्न गुजरात सरकारले आदेश दिएको छ। घटनाले राज्यको पुल संरचनामाथि गम्भीर प्रश्न उठाएको छ।दुर्घटनाप्रति शोक व्यक्त गर्दै स्थानीय बासिन्दाहरूले पीडित परिवारप्रति समवेदना प्रकट गरेका छन् र आगामी दिनमा यस्ता संरचनागत कमजोरीहरू नदोहरिने गरी आवश्यक कदम चाल्न सरकारसँग माग गरेका छन्।