गैँडाकोट — राष्ट्रिय स्वतन्त्र पार्टी (रास्वपा) को तेस्रो स्थापना दिवसको अवसरमा गैँडाकोट नगरपालिका–२ मा रास्वपा वडा समितिले सरसफाई तथा स्वास्थ्य जनचेतना कार्यक्रम आयोजना गरेको छ। सामाजिक उत्तरदायित्वका साथ सञ्चालन गरिएको कार्यक्रममा वडा समितिका सदस्यहरूसहित स्थानीयवासीहरूको उल्लेखनीय उपस्थिति रहेको थियो।
कार्यक्रमको अध्यक्षता रास्वपा वडा सभापति शिव लम्सालले गर्नुभएको थियो। उहाँले पार्टीको स्थापनालाई जनताको सेवामा समर्पित गर्ने अवसरको रूपमा उपयोग गरिएको बताउँदै जनसहभागिता र जनजागरणमार्फत रास्वपाले स्थानीय तहमा आफ्नो प्रभावशाली उपस्थिति जनाउँदै गएको उल्लेख गर्नुभयो।
भृकुटीचोकबाट सुरु गरिएको र्याली नारायणी टोल हुँदै एसपीएम टोलसम्म पुगेर सरसफाइ कार्यक्रम सम्पन्न गरिएको थियो। बिहान ७ बजेदेखि साढे ९ बजेसम्म सञ्चालन भएको कार्यक्रममा सरसफाइसँगै स्वास्थ्य जनचेतनामूलक सन्देश प्रवाह गरिएको थियो।
आगामी २०८४ सालको चुनावलाई मध्यनजर गर्दै रास्वपाले गैँडाकोट–२ मा आफ्नो सांगठनिक उपस्थिति क्रमशः सुदृढ बनाइरहेको छ। हालसम्म वडाभित्र २०० भन्दा बढी सदस्य रास्वपामा आबद्ध भइसकेका छन्। स्थानीय बासिन्दाले पनि यस प्रकारका कार्यक्रमले सामाजिक चेतनामा सकारात्मक प्रभाव पार्ने विश्वास व्यक्त गरेका छन्।
