चितवन, १८ जेठ । नारायणगढकी बालिका सरिना श्रेष्ठले देवघाटस्थित रामजानकी बालिका आश्रममा आफ्नो जन्मदिन मनाएकी छिन् । सरिनाको जन्मदिनको अवसरमा चितवन मर्सी राइज लायन्स क्लब नारायणगढले आज आश्रममा भोजन सेवा कार्यक्रम आयोजना गरी जन्मदिन मनाएकी हुन् ।

कार्यक्रममा लायन्स क्लब इन्टरनेशनल ३२५ आरका डिस्टिक्ट एक्जुकेटिभ चिफ माधवप्रसाद पौडेलले आश्रममा गएर जन्मदिन मनाउँदा लायन्सको गरिमासँगै बालबालिकाको संस्कार विकास हुने बताउनुभयो । जन्मदिनमा होटलमा गएर भोज भतेर गरेर जन्मदिन मनाउन भन्दा आवश्यक परेको ठाउँमा पुगेर बालिकाहरुसँग मनाउनु उत्कृष्ट काम भएको पौडेलले बताउनुभयो । सक्नेले आवश्यक परेको क्षेत्र र समुदायमा खर्च गर्नुपर्ने पौडेलको भनाइ थियो ।

कार्यक्रममा चितवन मर्सी राइज लायन्स क्लबकी अध्यक्ष राधिका बस्यालले जन्मदिन मनाउन अन्य ठाउँमा खर्च गर्नभन्दा आश्रममा आएर मनाउने सल्लाह भएपछि क्लबले कार्यक्रम आयोजना गरेको बताउनुभयो । आवश्यकताका आधारमा खर्च गर्दै अभावमा परेको ठाउँमा सहयोग गर्दा पूण्य प्राप्त हुने बस्यालले बताउनुभयो । सरिना श्रेष्ठ चितवन मर्सी राइज लायन्स क्लबकी सदस्य एवम् भोजन सेवा कार्यक्रमकी संयोजक लक्ष्मी श्रेष्ठकी सुपुत्री हुन् ।

आफ्नी छोरीले बालिकाहरु भएको ठाउँमा गएर जन्मदिन मनाउने चाहना राखेपछि क्लबको सहकार्यमा जन्मदिन मनाउन पुगेको उहाँले बताउनुभयो । सरिनाको जन्मदिनसँगै उहाँहरुले बाकिा आश्रममा एकदिनको भोजनका लागि आर्थिक सहयोग समेत गर्नुभएको छ । कार्यक्रममा लायन्स क्लब इन्टरनेशनल ३२५ आरका डिस्टिक्ट चिफ लक्ष्मी रिमाल पौडेल, गोविन्द अर्याल, आरती पन्त, नर्मिता ढकाल, मनिसा पाठक खड्गीको उपस्थिति रहेको थियो ।

रामजानकी बालिका आश्रममा शिशु कक्षादेखि कक्षा १२ सम्म अध्ययन गर्ने ३१ जना बालिकाहरु आश्रित रहेका आश्रमकी अध्यक्ष सावित्री टण्डनले बताउनुभयो । आश्रमले उद्धार गरेर ल्याएको ४६ जना बालिकाहरु समाजमा पुनःस्थापना भइसकेका टण्डनको भनाइ छ । आश्रममा बसेर अध्ययन गरेका केही बालिकाहरु भने अहिले समाजमा धार्मिक सचेता फैलाउन प्रवचन दिन सक्षम भएका छन् ।