नवलपुुर, ७ जेठ । पटक पटक विद्युत् अवरुद्ध हुने समस्याबाट पीडित भएका गैँडाकोटका होटल व्यवसायीहरुले आफ्ना लागि छुट्टै विद्युत् लाइन जडान गरिदिन माग गरेका छन् ।
सेवाग्राहीको चाप हुने रातिको समयमा विद्युत् अवरुद्ध हुँदा सास्ती खेप्नु परेको भन्दै व्यावसायीहरुले छुट्टै विद्युत् लाइनको माग गर्दै ज्ञापन पत्र बुझाएका छन् । मुकुन्दसेन मौलाकालिका होटल व्यवसायी संघ गैँडाकोटले मंगलबार नेपाल विद्युत् प्राधिकरण गैँडाकोट प्रशाखामार्फत कावासोतीलाई ज्ञापन पत्र बुझाउँदै रातिको समयमा हुने विद्युत् अवरुद्धका कारण व्यवसाय नै धराशायी बनेको बताएका छन् । त्यस्तै रातको समयमा बत्ती जाँदा समस्यामा पर्ने भएकाले रातिको समयमा पनि प्राधिकरणमा कर्मचारीको व्यवस्था गर्न माग गर्दै अन्यथा व्यवसायीहरुले व्यवसायको तालाचाबी बुझाउनुपर्ने अवस्था सिर्जना हुने विज्ञप्तीमा उल्लेख गरिएको छ ।
संघका अध्यक्ष शिवप्रसाद शर्माद्वारा हस्ताक्षर गरिएको विज्ञप्तीमा उल्लेख गरिएको छ, “देशको बिग्रँदो परिस्थिति, बाटोको अस्तव्यस्ताले व्यवसाय धरासायी भएको स्थितिमा बिजुली पनि छिनछिनमा जाने साथै रात्रिकालीन अवस्था सानो तिनो समस्या पनि सहजीकरण नभएकोले हामी ४५४ होटल व्यवसायीहरुको समस्या मध्यनजर गरि यथाशीघ्र गैँडाकोट नगरपालिकाका राजमार्ग लगायत सम्बन्धित अन्य सबै व्यवसायीको लागि छुट्टै लाइन र रात्रीकालीन परिस्थितिमा पनि यस प्राधिकरणमा कर्मचारी व्यवस्थापन होस् भनी ध्यानाकर्षण गर्दछौँ परिस्थिति सहज नभएमा हामी हाम्रा व्यवसायीका तालाचाबी बुझाउन बाध्य हुनेछौं ।”
संघका अध्यक्ष शर्माको नेतृत्वमा भएको ज्ञापनपत्र बुझाउने कार्यक्रममा उपाध्यक्ष सविन थापा, सचिव गोविन्द रेग्मी, सल्लाहकार संयोजक कमल गौतमलगायत होटल व्यवसायीहरुको सहभागिता रहेको थियो ।