नवलपुर, २० वैशाख । नवलपुरको गैँडाकोटमा रहेको जयश्री फुड्स प्रालि तथा जयश्री च्यारिटी नेपालको आयोजनामा आज भएको खुला रक्तदान कार्यक्रममा ३२ जना नयाँ रक्तदातासहित एक सय १८ जनाले रक्तदान गरेका छन् ।

जयश्री फुड्सका व्यवस्थापक अमित अग्रवालकाअनुसार जय श्री फुड्स प्रालिको १३औँ स्थापना दिवसको अवसर पारेर आयोजना गरिएको खुला रक्तदान कार्यक्रममा १२ जना महिला र एक सय ६ जना पुरुषले रक्तदान गरेका छन् । सामाजिक उत्तरदायित्व वहन गर्दै वार्षिक रुपमा रक्तदानसहितका कार्यक्रमको आयोजना गर्दै आएको अग्रवालको भनाइ छ । रक्तदान कार्यक्रममा सहभागी भई रक्तदान गरी मानवीय काम गरेका भन्दै सम्पूर्ण रक्तदाताहरुलाई जयश्री फुड्स र जयश्री च्यारिटी नेपालले धन्यवाद ज्ञापन गरेको छ ।

रक्तदान कार्यक्रममा गैँडाकोट नगरपालिका प्रमुख मदनभक्त अधिकारीले रगत अभावमा छटपटाइरहेका बिरामीहरुलाई बचाउका लागि आयोजना गरिएको यो मानवीय कार्यको जति प्रशंसा गरेपनि अधुरो हुने बताउनुभयो । जयश्री फुड्सका सञ्चालक पवनकुमार अग्रवालले यस क्षेत्रमा धेरै सामाजिक कामहरु गर्नुभएको भन्दै नगरप्रमुख अधिकारीले रक्तदान आयोजना गर्ने र रक्तदान गर्ने दुवैलाई पूण्य प्राप्त हुने बताउनुभयो । एकजना व्यक्तिको रगतबाट कम्तिमा पनि दुई जना बिरामीले जीवन दान पाउने भएकाले उमेर पुगेका स्वस्थ व्यक्तिले रक्तदान गर्नुपर्ने उहाँको भनाइ छ ।

जयश्री फुड्स प्रालिका सञ्चालक एवम् जयश्री च्यारिटी नेपालका अध्यक्ष पवन कुमार अग्रवालले यस क्षेत्रमा दुर्घटनाका घटनाहरु धेरै हुने र रगतको माग अत्यधिक हुने भएकाले आफूले बर्सेनि रक्तदान कार्यक्रम गर्दै आएको बताउनुभयो । कोही पनि बिरामी रगतको अभावमा मृत्युवरण गर्नु नपरोस् भन्ने आफूहरुको उद्देश्य भएको भन्दै अग्रवालले रक्तदान गर्दा रगत दिने व्यक्तिलाई पनि शारीरिक रुपमा फाइदा पुग्ने आफूले बुझेको बताउनुभयो ।