नवलपुर (नवलपरासी), १६ वैशाख

गैँडाकोटका महिलाहरुलाई स्थानीय वन जङ्गलमा खेर गइरहेको थाकलको पातबाट टोपी, झोलालगायत हस्तकलाको सामग्री निर्माण गर्न सिएकाइएको छ । गैँडाकोट नगरपलिकाले ओम राजश्री मल्टी एग्रो प्रा लि काठमाडौँको प्राविधिक सहयोगमा सञ्चालन गरेको तालिमबाट स्थानीय २५ जना महिलाहरु लाभान्वित भएका छन् ।
थाकलबाट निर्माण गरिएका हस्तकलाका सामग्रीको बजार माग उच्च भएको रहेको प्रशिक्षक लक्ष्मी विश्वकर्माले बताउनुभयो । प्रशिक्षणपछि थाकलको पातबाट महिलाहरुले तयार पारेको टोपी, ब्याग लगाएतका हस्तकलाका सामग्रीहरुको बजारीकरणमा आफूहरुले सघाउने उहाँले बताउनुभयो । आफूहरुले महिलाहरुसँग एउटा टेपीको कम्तिमा पनि रु सात सय रुपैयाँमा खरिद गर्ने उल्लेख गर्दै उहाँले बजारमा माग धेरै हुँदा आपूर्ति गर्नै समस्या भएको बताउनुभयो ।

गैँडाकोट नगरपालिकाले स्थानीय महिला समूहलाई लक्षित गर्दै थाकलको पातबाट हस्तकलाका विभिन्न सामग्री निर्माण सम्बन्धी ३० दिने सीपमूलक तालिम दिइरहेको छ । स्थानीय वन क्षेत्रमा निःशुल्क पाइने थाकलबाट सामग्री निर्माण हुने भएकाले यसको उत्पादनमा ठूलो लगानी गर्नु नपर्ने र बजारीकरणको समेत समस्या नभएको गैँडाकोट–४ का वडाध्यक्ष तेजप्रसाद घिमिरेले बताउनुभयो ।  टेकराज पोखरेल,रासस, नवलपुर