चितवन, ४ वैशाख । भरतपुरका लागि रोयल इन्फिल्ड मोटरसाइकलको आधिकारिक बिक्रेतचा सन अटोमोबाइल्सले क्लासिक ३५० सिरिजका पाँच भेरियन्ट सार्वजनिक गरेको छ ।

पुरानो आकर्षणलाई कायम गर्दै शैली र गुणमा आधुनिक सुधारसहित क्लासिक ३५० को आज सार्वजनिक गरिएको हो । रोयल इन्फिल्ड सिकेडीमा उत्पादित यो मोटरसाइकलको सुरुआती मूल्य पाँच लाख ५५ हजार रुपैयाँ तोकिएको छ । सन अटोमोबाइल्सका सञ्चालक गोविन्द श्रेष्ठले न्यू क्लासिक ३५० भेरियन्टलाई सातवटा आकर्षक रङमा उपलब्ध रहेको बताउनुभयो ।

पाँच भेरियन्टका बाइकहरुमा हेरिटेज प्रिमियम, सिग्नल्स, क्लासिक डार्क र क्लासिक क्रोममा उपलब्ध रहेको भन्दै प्रत्येक भेरियन्टमा आधुनिक इन्जिनियरिङसँगै आकर्षक डिजाइन रहेको उहाँको भनाइ छ । नेपालमा बढ्दो प्रिमियम मोटरसाइकलको मागलाई पूरा गर्न इनफिल्डको वृहत रणनीतिका निम्ति यो सुरुआत कोसेढुंगा हुने श्रेष्ठको भनाइ छ । नयाँ क्लासिक ३५० ले एबीएस मात्रै होइन विश्वव्यापी रुपमा प्रख्यात इनफिल्डको कलात्मक डिजाइनको अनुभव पनि ग्राहकलाई दिने श्रेष्ठको भनाइ छ ।

बिक्री शुभारम्भ कार्यक्रममा रोयल इन्फिल्ड पूर्वी क्षेत्रका एरिया सर्भिस म्यानेजर मुकुन्द रिमालले रोयल इन्फिल्ड क्लासिक ३५० को सुरुआती भेरियन्टमै कम्पनीले डुअल च्यानल एबीएस रहेको बताउनुभयो । उहाँकाअनुसार प्रिमियम एलइडी हेडल्याम्प एलइडी पाइलटल्याम्प पनि उपलब्ध हुने रिमालले बताउनुभयो । त्यस्तै बाइकमा टाइप सी युएसबी चार्जर सुविधासहित गियर सूचक जनाउने गियर इन्डिकेटर पनि रहेको रिमालको भनाइ छ ।

कार्यक्रममा चितवन अटोमोबाइल्स एशोसिएसनका पूर्वअध्यक्ष अमृत जोशीले रोयल इन्फिल्डका हरेक मोटरसाइकल अफरोड राइडका लागि समेत सुहाउँदो रहेको बताउनुभयो । सबै वर्ग र उमेरका लागि सुहाउँदो बाइकले यात्रालाई आरामदायी बनाउने गरेको जोशीको अनुभव थियो । कार्यक्रममा चितवन अटोमोबाइल्स एशोसिएसनका महासचिव मोहन केसी, चितवन अटोमोबाइल्स रिकण्डिसन एशोसिएसनका संस्थापक अध्यक्ष सूर्य अधिकारीलगायतले रोयल इन्फिल्ड मोटरसाइकलको बारेमा चर्चा गरेका थिए ।