नवलपुर, ३ वैशाख । गैँडाकोट नगरपालिकामा रहेको एकमात्रै क वर्गको विद्यालय गैँडाकोट इङ्गलिस स्कुलमा विद्यार्थीको आकर्षण बढ्दै गएको छ । विद्यालयले नयाँ विद्यार्थी भर्नाका लागि लिएको प्रवेश परीक्षामा आज मात्रै दुई सय जना विद्यार्थी सहभागी भएका विद्यालयले जनाएको छ ।
विद्यालयमा आफ्ना बालबालिका भर्ना गर्न आएका अभिभावकले यसअघिको विद्यालयले प्राप्त गरेको शैक्षिक नतिजा र विद्यार्थीहरुको अवस्थाको आधारमा विद्यार्थी लिएर आएको बताएका छन् । विद्यालयले खाली रहेको सिट संख्या परिपूर्तिका लागि आज पहिलो चरणको प्रवेश परीक्षा लिएको थियो । वैशाख ४ र ५ गते पुराना विद्यार्थीहरूको अभिलेखीकरण गर्ने र ६ गतेदेखि नयाँ विद्यार्थीको भर्ना प्रक्रिया सुरु हुने विद्यालयका प्राचार्य हीरालाल अर्यालले जानकारी दिनुभयो ।
विद्यालयले २१ औँ शताब्दी सुहाउँदो शिक्षा प्रदान गर्ने भएकाले विद्यार्थी र अभिभावकको आकर्षण बढ्दै गएको अर्यालले बताउनुभयो । विद्यालयले १० वर्ष अगाडि परम्परागत रुपमा सञ्चालन भएको भन्दै अर्यालले अहिले प्रोग्रेसिभ स्कुलको रुपमा अगाडि बढेको बताउनुभयो । यहाँ शिक्षा लिएका विद्यार्थीहरु संसारको जुनसुकै ठाउँमा गए पनि सहज हुने र उत्कृष्ट नागरिकको रुपमा विद्यार्थीलाई तयार गरिने बताउनुभयो ।
गैँडाकोट १ का अभिभावक प्रकाश अधिकारीले आफ्नी छोरी यही विद्यालयमा अध्ययन गरेको र उसको व्यवहार र शैक्षिक क्रियाकलाप राम्रो भएपछि छोरालाई पनि भर्ना गर्न ल्याएको बताउनुभयो । विद्यालयको गुणस्तर राम्रो भएको र विद्यालयबाट सन्तुष्ट भएकाले छोरालाई भर्ना गराउन प्रवेश परीक्षामा सहभागी गराएको अधिकारीको भनाइ छ ।
त्यस्तै गैँडाकोट–१ कि रिता न्यौपानेले सात वर्ष अगाडि बहिनीको छोरालाई बुटवलबाट ल्याएर यहाँ पढाएको भन्दै अहिले आफ्नी छोरीलाई पनि यहीँ भर्ना गर्न ल्याएको बताउनुभयो । बहिनीको छोराको पढाइसँगै सबै कुरा राम्रो लागेर अहिले आफ्नो छोरी पढाउन ल्याएको बताउनुभयो । विद्यालयले पाठ्यक्रमसँगै अन्य बाहिरी विषयमा समेत सिकाउने भएकाले विद्यालयको समुदायमा राम्रो प्रभाव रहेको उहाँको भनाइ छ ।
विद्यालयका जनसम्पर्क तथा सञ्चार अधिकृत श्रीहरि चालिसेले नयाँ विद्यार्थीको भर्ना तथा दोस्रो प्रवेश परीक्षा वैशाख ६ गते हुने बताउनुभयो । विद्यालयमा विद्यार्थीहरुको आकर्षण राम्रो देखिएकाले आज प्रवेश परीक्षामा आउन नपाएका र छुटेका विद्यार्थीलाई लक्षित गर्दै वैशाख ६ गते पुनः परीक्षा राखिएको चालिसेको भनाइ छ ।
