गैँडाकोट, १ वैशाख । नवलपुरको गैँडाकोटमा नयाँ होटल सञ्चालनमा आएको छ । गैँडाकोट नगरपालिका–२ एसपीएम कलेजसँगै नारायणी नदी किनारमा आजदेखि ‘पाम बार एण्ड रेस्ट’ सञ्चालनमा आएको हो ।

होटलको उद्घाटन मुकुन्दसेन मौलकालिका होटल व्यवसायी संघका अध्यक्ष शिवप्रसाद शर्माले गर्नुभयो । बजारमा बन्दी भइरहेको अवस्थामा होटल व्यवसायमा लगानी गरेका व्यवसायीलाई हातेमालो गरेर अगाडि बढाउनुपर्ने कर्तव्य सबैको भएको उहाँले बताउनुभयो । होटलको क्षेत्रमा ठूलो लगानी गर्ने अवस्था बढ्दै गएको र आफ्नो गुणस्तर र पहिचान आफैले निर्माण गर्नुपर्ने शर्माको भनाइ छ । आफ्ना ग्राहकलाई सन्तुष्ट बनाउन सकेको अवस्थामा व्यवसाय फस्टाउँदै जाने शर्माले बताउनुभयो ।

होटलका सञ्चालक विवेक गौतमले होटलमा विशेषगरी पेय पदार्थ एवम् खानाका परिकार उपलब्ध हुने भन्दै आफूले मल्टी कुजिन रेस्टुरेन्ट सञ्चालनमा ल्याएको बताउनुभयो । यो आफ्नो पहिलो व्यवसाय भएको भन्दै नयाँ जोश र उत्साहले होटलमा लगानी गरेको उहाँको भनाइ छ । कम्प्युटर एप्लिकेशनमा पढाइ गरेर पनि दुई तीन वर्षदेखिको योजनालाई होटल व्यवसाय होटलमा लगानी गरी साकार पारेको उहाँको भनाइ छ ।

आत्मविश्वास भएकाले होटल सञ्चालन गरेको उल्लेख गर्दै गौतमले आफ्नो व्यवसायले सफलता प्राप्त गर्ने बताउनुभयो । खानाको गुणस्तरीयतामा सम्झौता नगर्ने भन्दै सम्पूर्ण उपभोक्तालाई स्वच्छ र ताजा खाना उपलब्ध गराउने गौतमको भनाइ थियो ।