नवलपुर २४ चैत ः नवलपुरको गैँडाकोटमा आजदेखि दोस्रो संस्करणको वडास्तरीय मेयरकप भलिबल प्रतियोगिता सुरु भएको छ । गैँडाकोट–१८ मा सुरु भएको उद्घाटन खेलमा गैँडाकोट–३ ले विजयी सुरुआत गरेको छ ।

निकै प्रतिस्पर्धात्मक खेलमा गैँडाकोट–३ ले गैँडाकोट–१२ लाई हराएको हो । प्रतियोगिताको उद्घाटन गर्दै गैँडाकोट नगरपालिका प्रमुख मदनभक्त अधिकारीले यस्ता प्रतियोगिताहरुको आयोजना गर्नुको मुख्य उद्देश्य स्थानीयस्तरमा रहेका खेलाडीहरुको पहिचान गरी उनीहरूलाई राष्ट्रिय तथा अन्तर्राष्ट्रिय स्तरमा पु¥याउनु रहेको बताउनुभयो । नगरपालिकाले खेलकुदको विकासलाई उच्च प्राथमिकता दिएको नगरप्रमुख अधिकारीको भनाइ छ ।

प्रतियोगिता उद्घाटनका क्रममा नगर उपप्रमुख शान्ती कोइरालाले गैँडाकोट–१८ मा यस्ता किसिमका प्रतियोगिताको आयोजना गरेकोमा गैँडाकोट नगर खेलकुद विकास समितिलाई धन्यवाद दिनुभयो । यसप्रकारका खेलकुदका गतिविधिले स्थानीय मौलिक संस्कृति र पहिचानलाई खेल पर्यटनको माध्यमबाट चिनाउन सकिने कोइरालाको भनाइ छ ।

कार्यक्रममा नगरपालिकाका प्रमुख प्रशासकीय अधिकृत झविन्द्र खनालले गैँडाकोट–१८ को समग्र विकासका लागि नगरपालिका प्रतिबद्ध रहेको बताउँदै यस प्रतियोगिता त्यस कामको सुरुआती प्रतिबिम्ब भएको बताउनुभयो । वडास्तरीय भलिबल प्रतियोगिता उद्घाटनका क्रममा नगरपालिकामा क्रियाशील विभिन्न राजनीतिक दलका प्रतिनिधिहरू, वडा अध्यक्षहरू, एवम् स्थानीय बासिन्दाको उपस्थिति रहेको थियो ।

गैँडाकोट नगर खेलकुद विकास समितिका अध्यक्ष एवम् गैँडाकोट–९ का वडाध्यक्ष धामनाथ सापकोटाले आफूहरुले नगरस्तरीय खेलकुदलाई थप सशक्त बनाउन यस्ता प्रतियोगिताहरुले सकारात्मक प्रभाव पार्ने बताउनुभयो ।