चितवन, २२ चैत ।
नारायणघाटको क्याम्पाचौरमा ‘मेड इन नेपाल एक्स्पो तथा खाना महोत्सव’ हुने भएको छ । नेपाली युवा उद्यमी मञ्च चितवनको आयोजनामा चैत २९ देखि वैशाख २ गतेसम्म क्याम्पाचौरमा महोत्सव हुन लागेको हो ।
महोत्सवबारे जानकारी दिने उद्देश्यले आज भरतपुरमा अयोजना गरिएको पत्रकार सम्मेलनमा नेपाली युवा उद्यमी मञ्च चितवनका अध्यक्ष उमेश श्रेष्ठले महोत्सवमा नेपाली उत्पादनहरु राखिने बताउनुभयो । उहाँकाअनुसार नेपाली उद्यमीहरुले उत्पादन गरेका अचार, मह, मान्द्रो, झोला, डाइपर, चिया, जुत्ता, मसला, सरफ, साबुन, टोपीलगायतका सामग्रीहरु महोत्सवमा राखिनेछ । महोत्सवमा कृषि, निर्माण सामग्री, प्रविधि, हस्तकला, परम्पगारगत कपडा तथा इनोभेसनका एक सय भन्दा बढी स्टलहरु रहने श्रेष्ठको भनाइ छ ।
महोत्सव अन्तर्गत हरेक दिन साँझ ५ देखि ९ बजेसम्म विभिन्न जातिहरुको मौलिक एवम् परम्परागत खानाका परिकारहरु रहने श्रेष्ठले जानकारी दिनुभयो । जहाँ थकाली, थारु, तामाङ, नेवारी सहित विभिन्न जातीय तथा क्षेत्रीय भान्साका मौलिक स्वादहरुको अनुभव गर्न पाइने श्रेष्ठले बताउनुभयो । उहाँकाअनुसार महोत्सवको प्रवेश निःशुल्क हुनेछ भने महोत्सवमा हुने सांगीतिक प्रस्तुतीको भने रु पाँच सय टिकट तोकिएको छ ।
महोत्सवमा विभिन्न पाँच वटा ब्याण्डहरुको प्रस्तुती रहने पत्रकार सम्मेलनमा जानकारी दिइएको छ । महोत्सव अवधिभर युवामुखी समूहगत छलफल, स्टार्टअप आइडिया, पिचिङ, कविता वाचन, उत्प्रेरक भाषण, नवप्रवर्तनपरक प्रस्तुती रहने बताइएको छ । पत्रकार सम्मेलनका क्रममा नेपाली युवा उद्यमी मञ्च चितवनका संस्थापक अध्यक्ष निरञ्जन न्यौपानेले पहिलोपटक चितवन महोत्सवबाट सुरु गरिएको महोत्सव यसपटक छुट्टैरुपमा सञ्चालन गरिएको बताउनुभयो ।
