चितवन, २३ फागुन । नारायणघाटको लायन्सचोकमा रहेको एभरेष्ट बचत तथा ऋण सहकारी संस्था लिमिटेडले चितवनको पहिलो महिला अधिवक्ता फूलमाया रानाभाटलाई सम्मान गरेको छ । संस्थाले ११५औँ अन्तर्राष्ट्रिय नारी दिवसको अवसर पारेर शुक्रबार रानाभाटलाई सम्मान गरेको हो ।
चितवन जिल्ला अदालत बार एसोसिएसनको पहिलो अध्यक्षको रुपमा समेत निर्वाचन रानाभाटले विगत ३१ वर्षदेखि न्याय सेवामा सक्रिय रही महिला तथा बालबालिकाको क्षेत्रमा पु¥याउनुभएको योगदानको उच्च कदर गर्दै उहाँँलाई सम्मान गरिएको हो । नारी दिवसको सन्दर्भ पारी एभरेष्ट बचत तथा ऋण सहकारी संस्था लिमिटेडले रानाभाटलाई सम्मानसँगै ‘महिला हिंसा विरुद्धको कानुनी अवस्था र न्यायिक सहजीकरण’ समेत गरेको छ । संस्थाका महिला सेयर सदस्य लक्षित कार्यक्रममा सहभागी ५० जना सहभागी कार्यक्रममा महिला हिंसा विरुद्धको कानुनी अवस्था र न्यायिक सहजीकरण विषयमा अधिवक्ता रानाभाटले सहजीकरण गर्नुभएको थियो ।
त्यस्तै कार्यक्रममा महिलाहरुको क्षमता विकास अन्तरगत नेतृत्व विकास र उत्प्रेरणा सम्बन्धी नलेज नेपाल एकेडेमीका प्रबन्ध निर्देशक अर्जुन अधिकारीले सहजीकरण गर्नुभएको थियो । कार्यक्रममा सहकारीकी व्यवस्थापक सरु ढकालले सहकारीको संस्थागत गतिविधि र कार्यक्रमको उद्देश्यका बारेमा प्रकाश पार्दै सामाजिक उत्तरदायित्व अन्तरगत संस्थाले विभिन्न कार्यक्रम एवम् सचेतना गर्दै आएको बताउनुभयो । कार्यक्रममा संस्थाका सचिव मदन प्रसाद पौडेलले स्वागत एवम् धन्यवाद ज्ञापन गर्नुभएको थियो ।